"Реал" ёзда Погба ва Азарни сотиб олишга ишонмоқда

Манбанинг маълумотига кўра, "Қироллик клуби" раҳбарлари жамоанинг Чемпионлар лигаси ва Испания чемпионатидаги муваффақиятсиз иштирокидан кейин таркибни янгилаш устида бош қотиришмоқда.

Хабар қилинишича, 26 ёшли Погба ва 28 ёшли Азар трансфер нишонлари рўйхатини бошқариб турибди. Юқоридаги ҳар икки ўйинчини ҳам бош мураббий Зинедин Зиданнинг шахсан ўзи таркибда кўрмоқчи. Ўз навбатида футболчилар ҳам "Реал" ҳақида илиқ фикрларни билдиришган.

Погба МЮ таркибида охирги вақтларда омадсиз ўйинлар кўрсатмоқда ва агар жамоа ЕЧЛ йўлланмасини қўлга кирита олмаса кетиши мумкинлиги маълум қилинган.

Азарнинг "Челси" билан шартномаси эса 2019 йилнинг июнь ойида ниҳоясига етади. Аммо, Эден лондонликлар билан шартномани узайтиришни хоҳламаяпти. Маълумотларга кўра, "Реал" 100 миллион евродан кўпроқ пул таклиф қилса, "кўклар" бельгияликни қўйиб юборишга тайёр.

Жорий мавсум Погба МЮ учун 32та ўйин ўтказди ва 13та гол уриб, 9та голли пас берди.

Азар эса "Челси" таркибида АПЛда 16та гол урди ва 13та голли пас берди.