"Пахтакор" ва «UCELL»: ҳамкорликнинг янги уфқлари

Ҳар ҳафтанинг чоршанба ва шанба кунлари FM -102.7 "Водий Садоси" радиосида “UCELL тўлқинларида” дастури эфир юзини кўрмоқда. "Пахтакор" клуб ҳужумчиси Темур Ҳакимов ва клубимиз матбуот хизмати раҳбари Нодир Абдуқодиров мазкур дастурнинг спорт оламига мансуб биринчи меҳмонлари бўлдилар. Хужумчимиз суҳбат давомида ўз клуби ва олимпия терма жамоасидаги фаолияти хақида маълумотлар берди. Дастур бошловчилари Рустам Худойберганов ва Саша Демидовалар меҳмонларнинг жаҳон чемпионати-2014 тўғрисидаги фикрлари билан қизиқдилар. Суҳбат жуда самимий кечди десак, муболаға бўлмайди. Радиостанция тингловчилари СМС орқали футболчимизга ўз саволлари билан мурожаат қилиш имкониятига эга бўлишди. Темур Ҳакимов томонидан энг яхши савол эгаси деб топилган инсон ташкилотчилар томонидан эсдалик совғаси соҳибига айланди.

Таъкидлаш лозим, “Водий Садоси” радиостанцияси ва «UCELL» мобил алоқа оператори "Пахтакор" футбол клуби ҳамкорлари ҳисобланиб, клубимиз томонидан ўтказилаётган кўплаб тадбирларда иштирок этиб келишмоқда. Бундай тадбирлардан бири "Соғлом бола йили" муносабати билан ўтказилаётган “Омадли мухлис” ижтимоий акциясидир. "Пахтакор"нинг кўплаб мухлислари бу акция иштирокчиси ва ғолибига айланиб бизнинг клубимиз ва ҳамкор ташкилотлар томонидан тақдим этилган совғалар эгасига айландилар.

Ўз навбатида биз самимий ва қизиқарли суҳбат ташкил қилган "Водий садоси" радиоси ижодий жамоасига миннатдорчилик изҳор қиламиз.