Ўсмирларимиз 10 йил деганда биринчи марта Осиё чемпионатида иштирок этмайди
26 сен 2017 12:49
Янгиликлар
![](https://championat.asia/upload/storage/279794_original.jpg)
![](/upload/storage/279794_220.jpg)
Ўсмирларимиз 10 йил деганда биринчи марта Осиё чемпионатида иштирок этмайди
Негаки биз гуруҳда учинчи ўринни олиб келаси йил бўлиб ўтадиган Осиё чемпионати йўлланмасидан бебаҳра қолдик. Энди кейинги йил Малайзияда бўлиб ўтадиган U-16 Осиё чемпионатида ўн олтита жамоа орасида Ўзбекистон бўлмайди. Бу албатта биз учун минус, чунки қитъа миқёсидаги ҳар қандай турнирда Ўзбекистон нима қилиб бўлсаям иштирок этиши шарт.
Ўсмирларимизнинг Осиё чемпионатига чиқа олмагани фожеами? Буни фожеадан кўра кўпроқ хунук воқеа десак ярашади. Бу натижа бизга болалар футболи орқага кетаётганини кўрсатиб берди. Қитъа биринчилигида иштирок этмаслик, 2019 йил жаҳон чемпионатига бормасликни билдиради. Энди эътибор икки йилдан кейин 2019 йил ўтказиладиган саралаш баҳсларига қаратилади.
Статистикага назар ташлайдиган бўлсак, Ўзбекистон ўсмирлар терма жамоаси шу пайтгача еттита Осиё чемпионатида иштирок этган. Энг юқори натижа 2012 йил Эронда бўлиб ўтган мусобақада қўлга киритилган. Яъни, Ўзбекистон ўсмирлар термаси финалда Японияни ютиб чемпион бўлган. Ўшанда бош мураббий Дилшод Нуралиев эди. Буни қарангки, орадан беш йил ўтиб бошқа бир жамоа шу мураббий қўл остида мусобақа йўлланмасини қўлга кирита олмади.
Бошқа томондан ҳисоблаб кўрганда, биз ўн йил деганда биринчи марта Осиё чемпионатидан қуруқ қолдик. 2002 йилдан буёғига эса иккинчи марта. Негаки 2006 йил Сингапурда ўтказилган чемпионатга ҳам бора олмаганмиз. Ўшанда Непалда ташкил қилинган саралаш баҳсларида биз айнан Непалга ютқазиб қўйиб, мезбонлар улоқни илиб кетишган.
ЎСМИРЛАР ЎРТАСИДАГИ ОСИЁ ЧЕМПИОНАТИ (U-16)
2002 йил, БАА. Ўзбекистон иштирок этганми? Ҳа.
Якуний натижа? Тўртинчи ўрин, Хитой - Ўзбекистон 1:0. Бош мураббий - Рауф Инилеев.
2004 йил, Япония. Ўзбекистон иштирок этганми? Ҳа.
Якуний натижа? Гуруҳ босқичи, гуруҳда 3-ўрин. Бош мураббий - Ислом Аҳмедов.
2006 йил, Сингапур. Ўзбекистон иштирок этганми? Йўқ.
Сабаб? Саралашдан ўта олмаган.
2008 йил, Ўзбекистон. Ўзбекистон иштирок этганми? Ҳа.
Якуний натижа? Чорак финал, Ўзбекистон - Жанубий Корея 0:3. Бош мураббий - Роберт Гай.
2010 йил, Ўзбекистон. Ўзбекистон иштирок этганми? Ҳа.
Якуний натижа? Финал, Ўзбекистон - КХДР 0:2. Бош мураббий – Алексей Евстафеев.
2012 йил, Эрон. Ўзбекистон иштирок этганми? Ҳа.
Якуний натижа? Чемпион, Ўзбекистон - Япония 1:1 (пенальтилар серияси 3:1). Бош мураббий – Дилшод Нуралиев.
2014 йил, Таиланд. Ўзбекистон иштирок этганми? Ҳа.
Якуний натижа? Чорак финал, Ўзбекистон - Сурия 2:5. Бош мураббий – Александр Мочинов.
2016 йил, Ҳиндистон. Ўзбекистон иштирок этганми? Ҳа.
Якуний натижа? Чорак финал, Ўзбекистон - Ироқ 0:2. Бош мураббий - Темур Олимхўжаев.
2018 йил, Малайзия. Ўзбекистон иштирок этадими? Йўқ.
Сабаб? Саралашдан ўта олмади.
Х.Холиқов.
Ўхшаш янгиликлар
![AMP Logo](https://championat.asia/image/logo-amp.png)
Фикрлар