Ниҳоят "Милан" ва "Интер" "Сан-Сиро" лойиҳаси бўйича ҳукумат билан келишиб олди

Ёдингизда бўлса, бундан икки йил аввал Афсонавий "Сан-Сиро": пайдо бўлиши, хўжайинлари ва "Узуклар ҳукмдори" ҳақидаги мақолани эътиборингизга тақдим этган эдик. Орадан йиллар ўтиб, ниҳоят Милан клублари ўртасидаги муаммолар ҳал бўлмоқда...

"Миланда "Сан-Сиро" стадионининг янги кўриниши қандай бўлишини аниқлаб олишди", — деб эълон қилди мэр Беппе Сала. Унинг айтишича, ҳукумат вакиллари "Интер" ва "Милан" билан аренанинг қайта таъмирлаш ишлари бўйича келишувга эришган. Шунингдек, шаҳар мэри аниқлик киритдики: клублар маъмурият томонидан тақдим этилган амалдаги техник-иқтисодий асослардан ҳамда шаҳарсозлик режасидан четга чиқмасликка ва Сар-Сиро туманини спорт ва кўнгилочар воқеалар учун мўлжалланган яшил ҳудуд сифатида ривожлантиришга рози бўлишган.

Клублар икки хил вариантдаги лойиҳаларни тақдим этишган — "Черков" ва "Ҳалқалар". Катта эҳтимол билан, айнан биринчи вариант танланади. Аммо у тўлиқлигича лойиҳадаги каби кўринишда бўлмайди. Кўплаб савдо марказлари ва офислар қурилмайдиган кўринади... Бироқ ҳозирча лойиҳадаги деталларнинг катта қисми номаълумлигича қолмоқда.

Қурилиши режалаштирилган объектлар зичлиги дастлабки лойиҳада "Спорт ва ўйин-кулгу" категорияси учун белгиланган чекловдан 28 пунктга чиқиб кетаётганди — клублар 36 пунктни ҳудуд категориясини ўзгартириб, "Кўп функцияли қурилиш"га "айлантиришни" кўзлаганди. Айнан шу жиҳат музокараларда асосий муаммога айланди. Шунинг учун клублар анча вақтгача "оёқ тираб туриб олганди" — инвестиция ҳажми (1,2 млрд евро)дан келиб чиқиб қурилишдаги объектлар зичлигини ошириш зарур деб ҳисобларди. Бироқ якунда таслим бўлишди ва аста-секин талабларини камайтириб боришди. Иш охири қурилишнинг ҳозирги категориясининг юқори чегарасида — 35 пунктда тўхташди.

Аренанинг ташқи кўриниши ким мезбон сифатида ўйнашига қараб, рангини ўзгартиради (дербида эса — ким расмий мезбон бўлишига қаралади). 

Бироқ бу жараён жуда тез амалга ошиши ва қайта таъмирлаш ишлари жадал суратда олиб борилиши анча қийин масала. Беппе Сала Олимпиада-2026 очилиш маросими эски "Сан-Сиро"да бўлишини талаб қилди ва қолганлар бунга рози бўлишди.

Нозима Зарипова таржимаси