Китобда “Насаф” ФМ филиали иш бошлади

Воҳанинг турли туманларидаги футбол мактабларида бугунги кунда ёш авлоднинг соғлом униб ўсиши, шунингдек келгусида етук футболчиларни етказиб бериш борасида узлуксиз ишлар олиб борилмоқда.

“Соғлом бола” йилида “Насаф” футбол мактаби маъмурияти яна бир савобли ишга қўл урди. Сўлим Китоб туманидаги ёш футболчиларга футбол сир-асрорларини ўргатиш ва келажакда “Насаф” футбол клубининг кадрлар базасига замин яратиш мақсадида ушбу туманда “Насаф” академиясининг филиали очилди.

11 май куни бўлиб ўтган очилиш маросимида Китоб туман ҳокими, туман футбол федерацияси президенти Узоқ Худойқулов туман халқини ушбу хайрли иш билан қутлаб, келажакда Қашқадарё, қолаверса Ўзбекистон номини дунёга танитадиган футболчилар ушбу мактабдан етишиб чиқажагига ишонч билдиришини айтиб ўтди. Шундан сўнг саҳнага “Насаф” ПФК бош менежери Шамил Ярулин, бош мураббий Рўзиқул Бердиев, спорт директори Виталий Ни, “Насаф” футбол мактаби директори Сергей Кучеренко, Ўзбекистон терма жамоаси аъзолари Шоҳруҳ Гадоев ҳамда Элдорбек Суюновлар ташриф буюришди. Футбол мактаб филиали рамзий очилиш лентасини Узоқ Худойқулов, Рўзиқул Бердиев, Шамил Ярулин ва Сергей Кучеренко кесишди ва меҳмонлар филиал тарбияланувчилари билан эсдалик учун суратга тушишди. Шундан сўнг Шамил Ярулин йиғилганларни байрам билан қутлаб, туманда раҳбарлар футболни севишини кўриб яна бир бор хурсанд бўлганини қайд этиб ўтди. Асли Китоб фарзанди бўлган Рўзиқул Бердиев эса орзуларидан яна бири ушалаётганини таъкидлаб, шундай деди:

-Қадрли тумандошларим, қадрдонларим! Мен бугунги тадбирда иштирок этаётганимдан жудаям хурсандман. Туманимиз футболи раҳбарларига, шунингдек “Насаф” жамоаси раҳбарларига раҳмат, деб қоламан. Бу қилинаётган ишлар барчаси келажакда, албатта, ўз мевасини беради. Бугунги байрам билан барчани табриклайман.

Тадбир давоми сифатида давлатимиз мадҳияси садолари остида Қашқадарё вилоят Иккинчи лигаси мавсумнинг очилиши доирасида Республика байроғи кўтарилди. Биринчи тур учрашувида баҳс олиб бориш учун майдонга Китобнинг “Нефтчи” ҳамда Муборакнинг “Машъал-98” жамоалари тушиб келишди. Ташкилотчилар томонидан иккинчи лига футболчиларига махсус совғалар топширилди.

Сайтимиз номидан “Насаф” футбол мактабининг филиалига келгусида омад тилаб қоламиз. Ўзбек футболи йўлида қилинаётган ҳар бир хайрли ишларга ривож тилаймиз!

Олим ТОЛИПОВ.