Инчеондан ёзамиз. 10-кун кундалиги. Гандболдан адреналин, Фокиндан кумуш

Терма жамоамиз соат 12:30да “Гоянг” стадионига йўл олди, мен эса медиа марказга. Келинг, ундан аввал бўлиб ўтган спорт воқеаларига шарҳ берсам. Соат 9:00да боулингчиларимиз финалда қатнашишди. 26та жуфтлик ичида 20-ўрин. Албатта, бу ачинарли.

Корея вақти билан соат 11:00да бошланган гандбол учрашувини МОҚ ходимлари билан биргаликда кўрдик. Дастлаб терма жамоамиз 2:0 ҳисобида олдинда кетаётган эди. кейинчалик ташаббусни ўз қўлига олган гонконгликлар тўрт тўп фарқи билан олдинга чиқиб олдилар. Ўйиндан аввал баҳс фаворити сифатида биз қайд этилгандик. Аммо уч нафар гандболчимиз - Ҳабибахон Қодирова, Учаева Валерия, Зиборова Олга жароҳат туфайли учрашувда иштирок эта олмасдилар. Биз ғалаба қозонсакгина 5-ўрин учун курашни давом эттиришимиз мумкин эди. 59-дақиқада Гонконг 22:21 ҳисобида олдинга чиқиб олди. Учрашув якунига етишига 1 дақиқа қолган. Чамаси 50 сония қолганида ҳисоб тенглашди. Шундан сўнг тўпга эгалик қилган шарқликлар бор эътиборни ҳужумга қаратдилар. Бу пайтда учрашув 59-дақиқасининг 53-сонияси эди. Рақибдан тўпни олиб қўйган вакиламиз Анжелина Голоскокова бир уринишда олди чизиқда турган Екатерина Халмурадовага тўпни етказиб б ерди. Ўз навбатида Катя тўпни ушлаб олган ҳолда икки қадам ташлаб Чан Кам Линг дарвозасини ишғол қилди, биз баримиз “ГООООЛЛЛЛЛ”, - дея бақириб, бир-биримизни табриклар эдик. Агар 7 сония аввал ҳимоячиларимиз аниқ ҳаракат қилмасдан гол ўтказиб юборганларида, ҳозир биз эмас, қўшни хонадонда ҳайқириқ овозлари чиқаётган бўларди.




Назардан четда юрадиган спортнинг бу турларига алоҳида эътибор берсангиз, олам-олам адреналин олар экансиз. Шу ёшга етиб, мен фақат футбол деявериб, кўп нарсадан “қуруқ” қолганимни англаб етдим.  Ҳақиқатдан ҳам ажойиб ғалаба эди. Энди қизларимиз “А” гуруҳида учинчи ўринни қўлга киритган жамоага қарши баҳс олиб борадилар. Таиланд ва Ҳиндистон жуфтлиги ғолиби бизга қарши тушадилар.

Гандболни томоша қилиб бўлгач иш жойимга йўналдим. У ерда бироз ишлагач, устозим Анвар ака иккимиз 40 дақиқалик йўл бўлган спорт гимнастика саройига кетдик. Шаҳар аҳолига бой, машиналарни айтмасангиз ҳам бўлади, “пробка”ларда манзилга етиб олиш учун анча вақт кетади. Мендан ташқари,  аксарият чет эллик ҳамкасбларим вақтдан унумли фойдаланиш учун автобусда ишлаб кетадилар.



Кундаликни ёдимда сақлаб қолган воқеалар асосида ёзаяпман. Шунинг учун баъзи чалғишлар учун аввалдан узр сўрайман. Мана яна бир маълумотни сал қолса эсдан чиқариб кетай дедим. Бир кун авва медиа марказда Хитойнинг машҳур нашри, “Beijing times” мухбири Ясон Чанг Ўзбекистон делегациясидан бирор бир машҳур киши билан интервью ташкил этиб беришни илтимос қилди. МОҚ матбуот котиби Шавкат ака билан унга Оксана Чусовитинани таклиф қилдик. Бу унинг учун ҳақиқий совға эди. Спорт гимнастикасининг тирик афсонаси билан суҳбатлашиш ҳаммага ҳам насиб этавермайди. Чанг айтилган вақтда спорт шаҳарчасига етиб келди ва Оксанадан эксклюзив суҳбат олди.

Хуллас спорт гимнастикаси саройидаман. Саройга таъриф беришга ожизман. Аввалги кундаликларимда ёзиб ўтганимдек, бу ердаги барча ареналар бир хил сифатда. Айтишларича, бизда ҳам шундай сарой қуриш борасида режа тузилаётган экан. Универсал саройда баскетболдан тортиб, мини футболгача мавжуд. Истасангиз спорт гимнастикасини айланинг. Кириб чиқувчи трибуналар мавжуд бўлиб, арена исталганча кенгайиши ёки торайиши мумкин.



Антон Фокин соат 20:15да чиқиши керак эди. Унга қадар гимнастиканинг бошқа икки турида ғолиблар аниқланаётган бўлиб, мен улар орқали машғулот ўтаб олишни мақсад қилдим. Табиийки Анвар ака ёрдамида. Чучварани хом санаган эканман. Спорт гимнастикасини суратга тушириш, жамики ўйин ёки табиатни расмга олишдан энг қийини экан. Фотомухбирларда ФОКУС деган тушунча бор. Яъни, сиз мўлжаллаган кишингиз ёки предметни аввал фокусга оласиз , кейин шақиллатиб “босасиз” ва ўша йўналтирилган нуқта оригинал тарзда суратга олинади. Спорт гимнастикасида эса фокус ушладим деганингизда, спортчи ё окрабатика қилади, ё югуриб туриб сакрайди, хуллас фокусни қочириб юборасиз. Жуда ҳам қийин экан. Бир амалладим, биринчисида расмларга баҳо беринг. Лекин фотожурналистиканинг ҳам “тонкост”лари йўқ эмас. Яхшилаб пойлаб фокусни олиш мумкин. Бундай пайтда устоз отангдек улуғ мақоли менга қўл келади, Анвар ака ўз маслаҳатларини аямайдилар. Мана энди ўхшай бошлади. Кейин билсам, қуйидаги Фокиннинг сурати, спорт гимнастикасидаги энг қимматларидан бири экан. Фокус ушланиши ва позиция танлаш бўйича. Қани эди бизда ҳам “дода” спорт газеталари бўлса-ю, бош саҳифада катта ўлчамда шу суратлар чиқса. Эй, текинга ҳам бериб юборардим. Фақат бу футбол газеталарига тегишли эмас-да.



Фокинга ишқибозлик қилиш учун аренага МОҚ президенти Мираброр Усмонов, бош котиб Ойбек Касимов ҳам ташриф буюрдилар. Улардан ташқари яна 20 нафарга яқин ишқибозимиз бор эди. Лекин тўғрисини айтсам, хафа бўлиб кетдим. Жуда кўпчилик терма жамоалар, бир-бирларини қўллаб-қувватлаб юрибдилар. Бизнинг баъзи спортчиларимиз Усмонов қаерга борса боришяпти. Балки “очко” ишлашни мақсад қилишгандир. Лекин шуни айтишим мумкинки, ишонаверинг, улар ўтирган юқори сектордан кимлигингиз кўринмайди. КХДРни кўрсангиз эди, жуда кўпчилик спортчилар олқишлаш учун келяптилар. Биз ҳам секин-секин медал ола бошладик, қўллаб туриш керак ахир. Ишқибозлик орқали ҳакамга ҳам босим ўтказиш мумкин. Ўхшамаган “приёмига” қарсак чалиб ташланг, ҳакам бир балл бўлса-да қўшиб беради. Шуни ҳам ўргатишим керакми?



Фокиннинг чиқиши ажойиб бўлди. Тўғриси, бу спорт турини яхши баҳолай олмаганлиги учун, охирига қадар кутдим, нима бўлар экан деб. Эртакларда бўлгани каби ҳаммаси яхшилик билан тугади. Баҳс якунига етгач, Фокин билан бирга қайтдик. Жароҳати туфайли мусобақага жуда кам тайёргарлик кўрганини таъкидлаб ўтди. “Агар ҳеч бўлмаса, ярим йил тайёргарлик олиб борганимда, олтинга умид қилган бўлардим”, деди. Спорт шаҳарчасига келганимизда у лифтнинг 15-қават тугмачасини босди. Бино эса 16 қаватлик. Шунда мен ҳазиллашиб, “Қаранг, битта аввалгиси кумуш, агар энг тепада яшаганингизда олтин олар экансиз”, деб кулдим. У ҳам ҳазилкаш экан, “Демак, бунга ташкилий қўмита айбдор, мени бир қават пастга жойлаган”, дея кулиб қўйди. Ҳаётда ажойиб инсон экан. Эрта тонгда у Хитойга, жаҳон чемпионатида иштирок этиш учун учиб кетди. Сайтимиз номидан унга омад тилаймиз!



Бугунга бўлар, энди менга рухсат, Ўзбекистон терма жамоасининг ўйинига боришим керак. Кундалик ёзиш ўзимга шу қадар ёқиб қолдики, Тошкентга қайтганимда нима қилар эканман деб ўйланиб қолдим. Бу ёғи бир гап бўлар, аммо Ватанни киши ёмонам соғинди.

25 сентябрь. Жанубий Корея, Инчеон.
Нодирхўжа Юлдашев.