Эрон футбол Федерацияси ОФКга бойкот эълон қилди

Бу йилги тантанали маросим 1 декабрь куни БАА пойтахти Абу-Даби шаҳрида бўлиб ўтади.

ОФК ушбу мамлакатнинг ютуқларига муносиб баҳо бермагани учун маросимда қатнашмаслигини Эрон футбол Федерацияси президенти Меҳди Тож маълум қилди.

"Биз энг яхши бўлиш учун даъвогарлар орасида йўқлигимизни билгач ОФК гала маросимига бормасликка қарор қилдик", - дейди ОФК президенти Шайх Салмон бин Иброҳим ал Халифага хат ёзган Меҳди Тож.

"Эрон футзал терма жамоаси Колумбиядаги мундиалда учинчи ўринни эгаллади. Жамоа вакили Аҳмад Исмоилпур эса Жаҳон чемпионатининг бронза тўпини қўлга киритди".

"Эрон U-19 ва U-16 терма жамоалари Жаҳон чемпионатига йўлланма олишди. Пляж футболи бўйича Эрон терма жамоаси Дубайдаги Қитъалараро кубогида иккинчи ўринни эгаллади. Бундан ташқари айнан эронлик Алиризо Фағони Рио-де-Жанейродаги Олимпиада ўйинларининг футбол мусобақаси финалида бош ҳакам бўлди".

"Эрон миллий терма жамоаси айни пайтда ЖЧ-2018 саралашида ўз гуруҳида биринчи ўринда бормоқда. Жамоа ФИФА рейтингида 27-ўринга чиқиб олди. Эрон Осиё терма жамоалари орасида энг биринчи поғонада турибди. Эрон футбол Федерацияси ўз тарихида илк бор бир йил ичида бундай натижаларга эришди", - дейди Меҳди Тож persianfootball.com нашрига.