"Чемпион бўлишни истасак, "Сити" майдонига ғалаба қозониш учун боришимиз керак" — Жезус

"Ҳозир кўп нарса содир бўлмоқда. Биз салбий нимадир ҳақида гапиришни истамаймиз, чунки ушбу мавсумда қилаётган ишларимиз ҳайратланарли эканлиги боис ҳаммасига ижобий қараяпмиз. Ҳозир қийин пайт. Бирга бўлиш вақти келди. Бу мавсумда қиладиган ишларимиз ҳали кўп, ҳали мавсум тугамади, биз ҳали беш очко олдиндамиз. "Манчестер Сити"нинг иккита ўйини бор, аммо чемпион бўлишни истасак, у ерга ғалаба қозониш учун боришимиз керак, тамом. Биз лигадаги энг ёш жамоамиз, лекин баҳона қидирмаяпмиз. Баъзида биз тўғри иш қиламиз ва баъзида хатога йўл қўямиз, ҳамма хато қилиши мумкин, шунинг учун бирга бўлиш жуда муҳим", – деди футболчи.

"Арсенал" 75 очко билан АПЛ турнир жадвалида пешқадамлик қилмоқда. Иккинчи ўриндаги "Манчестер Сити" 5 очко орқада, аммо Хосеп Гвардиола шогирдларида иккита захира ўйини бор.

Эслатиб ўтамиз, "Манчестер Сити" – "Арсенал" беллашуви 26 апрель куни бўлиб ўтади.