"Бунёдкор": Ғофуров ва Каримов 200лик маррада

Учрашув бошланиши олдидан ҳар иккала жамоа футболчилари “Бунёдкор” стадионига йиғилган мухлислар қаршисида “қалдирғочлар”нинг икки нафар аъзоси – Анвар Ғофуров ва Хайрулла Каримовга 200-рақам акс эттирилган маҳсус футболкалар топширилди.

Гап шундаки, ҳар иккала футболчи “Бунёдкор” сафида узоқ йиллардан бери тўп тепиб келишмоқда ва уларнинг жамоа сафида ўтказган расмий учрашувлари сони 200лик довондан ошиб кетди. Анвар Ғофуров бу маррани ўтган мавсум олий лига 22-тури доирасида ўтган “Металлург” – “Бунёдкор” учрашувида забт этган бўлса, Хайрулла Каримов “Ал-Наср”га қарши ўйинда “қалдирғочлар” сафидаги ўзининг 200-учрашувини ўтказди.

Шу муносабат билан “Бунёдкор” – “Ал-Наср” учрашуви бошланиши олдидан бош мураббий Сергей Лушан ҳар иккала шогирдига 200-рақам туширилган футболкаларни тантанали равишда топширди.



Ўйлаймизки, Анвар Ғофуров ва Хайрулла Каримов сингари бой тажрибага эга бўлган футболчилар ҳали кўп вақт ёшларга ўрнак бўлишиб, уларни келажакда етук футболчи бўлиб етишишларида ўз ҳиссаларини қўшишади.

Эслатиб ўтамиз, “Бунёдкор” сафида биринчи бўлиб 200лик маррага ярим ҳимоячи ва эндиликда ўз фаолиятини “Шўртан”да давом эттираётган Виктор Карпенкога етиб келганди. Унинг “қалдирғочлар” сафидаги 200-учрашуви 2012 йилнинг 8 октябрь кунида ўтган “Локомотив” – “Бунёдкор” учрашувига тўғри келади.