Бахтиёр Ашурматов: Қувондиқ анча вақтдан бери жароҳат билан ўйнамоқда

Йигитларимизнинг матонатига ва ўзларида куч топаётгани учун мураббийлар штаби номидан миннатдорчилик билдираман. Чунки, бугуни учрашувдан олдин жамоамизнинг саккиз нафар футболчисида жароҳат бор эди ва ш сабабли захирадан тўртта футболчи жой олди. Шунга қарамасдан, йигитларимиз ўзларида куч топа олди ва охиргача курашишда давом этиб, ярим финалга йўл олишди. Кубокка иккита қадам қолди ва охиригача муносиб қатнашамиз. Ўйин ҳақида фикр билдирадиган бўлсам, биринчи бўлимда устунлик биз томонда бўлди ва гол урдик. Агар биринчи бўлимни ўзида иккинчи голни ҳам уришга эришганимизда иккинчи 45 дақиқаликда осонроқ бўларди. 

Иккинчи бўлимда эса «Машъал» футболчилари яхши ҳаракат қилишди. Муборакликлар «Шўртан»га қарши учрашувда асосий футболчиларининг бир нечтасига дам берди ва шу сабабли уларнинг жисмоний ҳолатлари яхшироқ эди. Улар иккинчи бўлимда устунликка эга бўлди ва тўп назорати уларда бўлди. Охирги дақиқада дарвозабонимизнинг ажойиб ҳаракати сабабли голдан қутилиб қолдик. Бизда иккита кучли дарвозабон бор ва уларнинг ҳар иккиси яхши ҳаракат қилишмоқда. «Машъал» футболчиларига раҳмат айтаман, улар мағлубиятга учраётганига қарамасдан сўнгги дақиқаларда фаир-плайга амал қилиб тўпни қайтариб берди. «Машъал» сўнгги тўртта учрашувда мағлубиятга учрамади. Шу сабабли биз бугун муносиб рақибни мағлуб этиб, кейинги босқичга йўл олдик деб ўйлайман. Бу ғалаба билан мухлисларни табриклайман.

Маҳаллий мухлисларнинг эътирози ҳақида...

Тўғри улар эътироз билдиришди. Бироқ ўйин якунидан сўнг мен уларга миннатдорчилик билдирдим. Ўйин вақтида футболчиларимни ҳақорат қилишганда, мен улар учун охиргача туриб беришга тайёрман. Чунки улар қийин вақтда ҳам мураббийларнинг шаъни учун курашишмоқда. Мухлисларни ҳам тўғри тушунаман. Ўйин якунидан сўнг улар билан суҳбатлашдим ва барчасини тўғри тушунтирдим.

Қувондиқ Рўзиевнинг жароҳати қанчалик жиддий?

Қувондиқ анча вақтдан бери жароҳат билан ўйнамоқда. Чунки таркибимизда кўплаб жароҳатлар борлиги сабабли, унга дам бериш имконимиз йўқ. Қувондиқдан ташқари, Холмуҳаммедов, Мерзляков ва бошқа футболчиларимизда жароҳатлар билан ҳаракат қилишмоқда. Мавсум чўзилиб кетди, захирамиз эса тор. Умид қиламанки, ярим финалда Қувондиқ тайёр бўлади ва жамоага ёрдам беришда давом этади.