Хави: "Барселона" кам ўйин амалиёти берилаётганларни майдонга тушириши керак бўлиб қолди"

ЛаЛиганинг 27-тури доирасидаги учрашувда каталонияликлардан Усмон Дембеле, Педри, Андреас Кристенсен, Френки де Йонг каби футболчилар қатнашгани йўқ.

"Хурсандман. Бугунги ўйинга таркибни тузар эканман, кам ўйин амалиётига эга бўлаётган футболчиларни майдонга туширишга мажбур бўлдим. Улар юқори даражадаги ўйинни намойиш қилиб беришди. Мана бу ҳақиқий жамоа.

Яна бир қадамни ташладик ва жуда керакли ғалабага эришдик. Жамоанинг ўйинидан мамнунман.

Тўғрисини айтсам, Эрик Гарсияни марказда ўйнатиш ғояси Йорди Кройффдан чиқди. У буни ўтган йилдан буён менга гапириб келаётганди. Буни мураббийлар штаби билан биргаликда ўйладик ва сўнгги ойлар давомида уни машғулотларда таянч футболчиси сифатида ўйнатдик. У бугун яхши ўйин намойиш қилди. Менимча ундан яхши таянч ярим ҳимоячиси чиқади.

Фати бугун идеал ўйнади, гол эса доимо ишонч баҳш қилади. Ансу ўйин сўнгида чарчаб қолди, чунки у катта меҳнат қилди. У менга жуда муҳим. Гол - унинг меҳнати самараси бўлди. Шунингдек, Ферран Торрес учун ҳам хурсандман. У ҳам голга лойиқ меҳнат қилди", - деди "Барселона" устози.