JCH-2014 ishtirokchilari - Braziliya

Bu terma jamoa haqida gap ketganda avvalo jahon chempionatlari gegomoni ko'z oldimizda gavdalanadi. Braziliya termasi mundialda o'ynash va unda g'olib bo'lish borasida etakchi hisoblanishadi. Pele vatandoshlari Jahon chempionatida eng ko'p g'oliblikni qo'lga kiritgan terma jamoasi sanalishadi. Ular besh marotaba ushbu oltindan bo'lgan kubokni boshlari uzra baland ko'tarishga muvoffaq bo'lishgan. Braziliya barcha mundiallarda ishtirok etgan yagona terma jamoa hisoblanadi.

Ayni paytda terma jamoani 2002 yilgi mundialda g'oliblik shohsupasiga olib chiqa olgan Luis Felipe Skolari boshqarib bormoqda.
Aynan shu mutaxassis qo'l ostida "pentakampeonlar" so'nggi bor Jahon chempionatida g'olib bo'lishgan.

Luis Felipe Skolari zimmasida bu safar ham faqat va faqat chempionlik vazifasi qo'yilgan. Braziliyaliklar so'nggi ikkita mundialni ko'ngildagidek o'tkaza olishmadi. 2006 yili Germaniyada bo'lib o'tgan chempionatda chorak finalda o'z yurishlarini to'xtatishga majbur bo'lishgan edi. 2010 yili JARda bo'lib o'tgan mundialda ham so'nggi bekat chorak finali bo'lgan.
Ushbu muvaffaqiyatsizliklardan so'ng yana Skolari vaziyatni o'nglash maqsadida terma jamoa boshqaruviga o'tkazildi. Skolari tanlagan tarkibdan Kaka, Ronaldino, Robino kabi futbol yulduzlariga joy topilmadi. Ko'pchilik uchun ushbu "trio"ni safdan chiqib qolgani kutilmagan xol bo'ldi.

Yakuniy tarkibga nazar solsak, Luis Felipe Skolari ushbu chempionatda ko'proq Neymar, Xalk va Fred kabi futbolchilarga ishonmoqda va shu ijrochilar etakchilikni o'z qo'liga olishi kutilmoqda. 

Braziliya terma jamoasi azal-azaldan hujumkor jamoa sifatida ko'pchilik mehrini qozongan. Ayni paytdagi tarkibga nazar tashlaydigan bo'lsak, unda eng kuchli chiziq deb himoyani ko'rsatishimiz mumkin. Ha, Braziliya terma jamoasining hozirgi davridagi eng kuchli chizig'i bu himoya. Bu chiziqda dunyoning eng kuchli himoyachilari sanalmish Tiago Silva, Bonfim Dante, David Luiz, Maykon, Dani Alvesh, Marselo va Maksvell kabi futbolchilar jamlanishgan. Mundialdagi eng kuchli himoya so'zsiz Braziliya termasiniki. 

Braziliya terma jamoasiing eng zaif nuqtasi deb yarim himoya chizig'ini aytib o'tish mumkin.  Ronaldino va Kakalarni safga qo'shmagan Skolari, mundialda asosiy tarkibda “CHelsi”dagi “trio” Ramires, Oskar va Villian tayanayotganini sezish mumkin. Lekin “pentakampionlar” o'rta chizig'ida katta musobaqalarda qatnashib, etarli tajribaga ega etuk ijrochilar yo'q. SHuningdek, yana Luis Gustavo va Fernandino kabi tayanch yarim himoyachilari mavjud. Boshqa grand jamoalar bilan taqqoslaganda, mundial mezbonlarining o'rta chizig'i kuchsizroqdek ko'rinadi. Lekin Luis Felipe Skolari nimalarni o'ylab qo'yganini o'zi biladi.
Hujumchilarga to'xtaladigan bo'lsak, Neymar, Xalk va Fred kabi oldinda yaxshi harakatlana oladigan ijrochilar bor. Braziliya terma jamoasi tarkibida yorqin ajralib turadigan futbolchi yo'q. To'g'ri, ko'pchilik Neymar ushbu mundialda jamoa etakchisiga aylanishini kutmoqda. Lekin Skolari ko'proq jamoaviy o'yinga etiborini qaratmoqda.

Braziliya terma jamoasi har qanday musobaqada, har qanday tarkibi bilan ham g'oliblikka asosiy davogarlardan biri sifatida qaraladi. CHunonam ushbu chempionat o'z vatanlarida bo'lib o'tadi va bu ularga qo'shimcha kuch bag'ishlashi aniq.
Ular uchun vazifa va maqsad bitta – bu chempionlik!

O'tgan ikkita mundialda (2006, 2010) Braziliyaning muvaffaqiyatsiz ishtirokidan so'ng, muxlislar o'z jamoalarini juda yomon kayfiyatda kutib olishgan va futbolchilarni kaltaklamoqchi ham bo'lishgan. Buni yaxshi payqagan bir necha futbolchilar o'z vatanlariga qaytmasdan, to'g'ri Evropaga qarab yo'l olishgani ham bunga misol bo'la oladi. JARda bo'lib o'tgan mundialda Braziliyani Gollandiya terma jamoasi turnirdan chiqarib yuborgan edi. O'sha bahsda Felipe Melo maydonni qizil kartochka olib erta tark etishga majbur bo'lgandi. Keyin esa Felipe Melo vaziyatni tushungan va yurtiga qaytishni o'rniga Turinga yo'l olgandi. Felipe Meloning Braziliyadagi o'yi oldida muxlislar tartibsizlik keltirib chiqarishgan va futbolchiga Braziliyaga kelmaslikni taklif etishgan. Bunga o'xshash voqealar juda ko'p ruy bergan. Buni Braziliya terma jamoasi vakillari yaxshi tushunib turishibdi. Kamiga mundial o'z uylarida bo'lib o'tadi. Ularni bu safar xato qilishga haqlari yo'q.  Bo'lmasa muxlislardan qutula olishmasligi aniq...

Braziliya terma jamoasi haqida:
Laqabi: "pentakampionlar"
Mintaqasi: KONMEBOL
Ilk o'yini: Argentina - Braziliya 3:0 (1914 yil)
Eng yirik g'alabasi: Braziliya - Nikaragua 14:0 (1975 yil)
Eng yirik mag'lubiyati: Urugvay - Braziliya 6:0 (1920 yil)
Bosh murabbiy: Luis Felipe Skolari
Jamoa sardori: Tiago Silva
Eng ko'p o'yin o'tkazgan futbol: Kafu (142 uchrashuv)
To'purar: Pele (77 ta gol)
FIFA reytingidagi o'rni: 10

Erishgan yutuqlari:

5 karra Jahon chempioni - (1958, 1962, 1970, 1994, 2002)
Amerika chempioni 8 - marotaba (1919, 1922, 1949, 1989, 1997, 1999, 2004, 2007)
Konfederaciyalari kubogi sohibi: 5 marta (1997, 1999, 2005, 2009, 2013)

Braziliya terma jamoasining mundialda ishtirok etadigan tarkibi:

Darvozabonlar: Julio Sezar, Jefferson, Viktor Leandro.

Himoyachilar: Dante, David Luiz, Tiago Silva, Enrike, Dani Alves, Maykon, Marselo, Maksvell.

Yarim himoyachilar: Fernandino, Ernanes, Luis Gustavo, Oskar, Paulino, Ramires, Villian.

Hujumchilar: Bernard, Fred, Xalk, Jo, Neymar.

SHahboz Beg'amov