Uchqun Qobilov: "Barcha jamoalar "Dinamo"ga qarshi bor kuchi bilan o'ynayapti"

- Uchqun aka, birinchilikning autsayder klubi jiddiy qarshilik ko'rsatishini kutganmidingiz?

- CHindan ham raqib jamoa ancha yosh bo'lishiga qaramay, bizga qarshi jiddiy qarshilik ko'rsatdi. O'yinda to'liq ustunlik qilgan bo'lsakda, buni hisobda aks ettira olmayapmiz. Bugun ham birinchi bo'limning o'zidayoq vaziyatlarni golga aylantirganimizda hisob 5:0 ko'rinishida bo'lishi kerak edi. Afsuski, samaradorlik bobida oqsayapmiz va endi yanada ko'proq ishlashimiz kerak. Eng asosiysi uch ochkoni qo'lga kiritdik.

- Dinamo so'nggi besh o'yinda 5 ta g'alabani qo'lga kiritgan bo'lsada, har bir bahsda katta qiyinchilik bilan g'olib bo'lmoqda. Yani bir gol farqi bilan. Bu nima bilan bog'liq?

- Birinchi Liganing o'tgan 7 tur yakunlariga ko'ra, shuni angladimki, har bir raqib aynan Samarqandga kelib Dinamoga qarshi bor kuch va imkoniyatini ishga solib to'p surmoqda. Har bir jamoa juda jiddiy tayyorgarlik bilan kelmoqda. Qolaversa, safarda o'tkazilgan o'yinlarimizda ham raqiblarimiz Dinamoga qarshi xuddi so'nggi o'yinga tushgandek bor kuchlarini maydonga tashlashmoqda. SHu bois bo'lsa kerak, qiyinchilik bilan bo'lsada g'alabaga erishayapmiz.

- Bugun safga yarimhimoyachi Azamat Bobojonov qo'shilgan bo'lsa, endi hujumchi Alisher Xoliqovning o'rni bilindi…

- Bobojonov jarohatdan forig' bo'lib safga qaytdi. Uning yordami jamoamizga muhim. Tajribali hujumchi Alisher Xoliqov esa Nukusda suniy qoplamada oyog'idan jarohat olib safdan chiqdi. Uning tiklanishi uchun ikki haftaga yaqin vaqt ketadi.

- Bugun yarimhimoyachi Jasur Azimov ham jarohat oldi. Qolaversa, Saidjamol Davlatjonov va Doston Ibragimov ham tarkibda yo'q. Ular NBU-Osiyoga qarshi yakshanba kungi uchrashuvda maydonga tushadimi?

- Jasur Azimov jarohati jiddiy emas. Uning oyoqlari tomiri tortishib qolgani uchun o'yinni davom ettira olmadi. Keyingi o'yinga safga qaytishi kerak. Saidjamol va Doston esa O'zbekiston yoshlar terma jamoasiga taklif etilgan. SHu bois bizga yordam bera olishmayapti. Ko'rib turganigizdek, jarohatlar va bir qator sabablar bois jamoamiz optimal tarkibda to'p sura olmayapti. Umid qilamanki, ikki haftalardan keyin barcha futbolchilar imkoniyatidan foydalana olamiz.

Dinamo Matbuot xizmati.