O'zbekiston - Qatar o'yini chiptalari sotuvi masalasi qanday ketmoqda?

Bugun uzoq vaqtdan beri birinchi marta chipta sotib olgani keldim. O'zim uchun emas - baxtimga, jurnalistik akkreditaciyam bor. Qozog'istondan tanish jurnalistlar o'yinga kelib, chipta olishda yordam berishlarini so'rashdi, chunki ularni onlayn sotib olishning iloji yo'q. Bu haqda, darvoqe, sal keyinroq gapirib beraman.

Meni hayron qoldirgan birinchi narsa: chiptalar qachon sotilishini hech kim bilmasdi. Kecha kechqurun O'FA chiptalar uchta joyda - "Bunyodkor," "Paxtakor" va "Humo Arena" stadionlari kassalarida sotuvga chiqarilishini malum qildi. Shu bilan tamom. Aniq vaqti yo'q edi.

Taxminan 9:20 larda "Bunyodkor"ga etib keldim. Bu vaqtga kelib kassalarda 150-200 ga yaqin odam bor edi. "Navbatlar" aniqrog'i, ularga o'xshash narsa shakllana boshladi. Odamlar ancha tartibsiz turishar, ko'pchilik oldinga o'tishga urinardi. Hatto shunday manzarani kuzatganmanki, otasi o'g'lini navbatsiz bilet olish uchun oldinga o'tkazib yuboradi. U buni uddalay oldimi-yo'qmi, bilmayman, lekin buni kuzatish juda qiziqarli edi.

Taxminan 10:40 da kassalarga ikkita kichik banner osildi: birinchisi - to'lash mumkin bo'lgan to'lov tizimining nomi (Humo yoki UzCard), ikkinchisi - stadion yarusi (birinchi yoki ikkinchi). Yaxshiyamki, menda ikkala to'lov tizimining kartalari bor. Ammo tasavvur qiling: qo'lingizda Humo kartasi bo'lsa-yu, siz faqat UzCard orqali to'lash mumkin bo'lgan navbatda turgan bo'lsangiz? Yoki sizga boshqa qavatga chipta kerak bo'lsachi?

Soat 11:00 ga yaqin chiptalar sotuvi boshlandi. Chipta sotib olgan birinchi omadlilarni qarsaklar bilan kutib olishdi. Navbatlar asta-sekin siljiy boshladi, ular bilan birga tartibsizlik ham boshlandi. Odamlar yon tomondan, asosiy chiziqni aylanib o'tishga harakat qilishdi. Shu munosabat bilan kichik janjallar kelib chiqdi va bir marta mening ko'z oldimda bir erkakni navbatdan tortib olib, oxiriga jo'natishdi.

Eng qizig'i - huquq-tartibot idoralari xodimlari o'zlarini qanday tutishgani. "Bunyodkor" stadioni kassalari yonida 7-8 nafar atrofida edi. Ular bir nechta o'ta ayyor qahramonlar allaqachon kirgan navbatlar shakllangandan keyingina "ishlay" boshladilar. Qaysidir nuqtada ular odatiy navbatni yaratishga harakat qilishdi, bir qatorda 2-3 kishi, bularning barchasi behuda edi. Nima uchun chiptalar sotilishidan oldin navbatlarni to'g'rilash mumkin emas edi? Navbatlar tuzish, hech kim oldinga chiqishga urinmasligiga etibor berish.

Soat 12:40 larda kassa yonidaga etib bordim. Yana taxminan 10 daqiqa kutdim va kassaga deyarli yopishib qoldim. Orqamda navbatda turgan odamlar zich turish u yoqda tursin, oldinda turganlarning elkalarida "osilib" turishardi. Yana ozgina bo'lsa, haqiqiy tiqilinch bo'lardi.

Soat 13:00ga yaqin "Bunyodkor" stadionidan chiptalar bilan yo'lga chiqdim. Shundan so'ng, avvaliga "Paxtakor" stadioniga, keyin esa "Humo Arena"ga borib, u erda chiptalar savdosi qanday ketayotganini ko'rdim.

Birinchidan, "Paxtakor" stadioniga chiptalar odatdagi kassalarda, fan-shop yonida emas, balki stadionning boshqa tomonida (Alisher Navoiy kino saroyi va Ilhom teatri tomonidan) sotilmoqda. Bu haqda ham hech qaerda yozilmagan. U erda navbat sezilarli darajada kam edi va men u erda bo'lgan 3-4 daqiqa ichida birorta ham janjalni ko'rmadim. Odamlar bir-birini itarishmas, ozmi-ko'pmi odatiy navbatda turishardi.

"Humo Arena"da ham shunday bo'ldi. Hech qanday muammo sezmadim. Ehtimol, "Bunyodkor" stadioni kassalaridagi tartibsizliklar odamlar aynan o'sha erga chipta olishga odatlangani bilan bog'liqdir. Yodimda, O'zbekiston milliy terma jamoasi o'yiniga chiptalar "Bunyodkor" stadioni kassalaridan boshqa joyda sotilishi ilk bor kuzatilmoqda. Shunga ko'ra, u erda eng ko'p odam bor, shuning uchun tartibsizliklar ko'proq.

Endi chiptalarni sotish formati haqida. Chiptalarni oflayn sotish g'oyasining o'zi o'zini oqlaydi: O'zbekiston milliy jamoasining o'tgan o'yinlarida "chipta sotuvchilari" chiptalarni iTicket.uz orqali sotib olishgan, shundan so'ng ularni OLX orqali bir necha bor sotishgan. Natijada, ko'plab muxlislar o'sha paytda stadionga kira olishmadi, chunki elektron chipta orqali faqat bir kishi - birinchi bo'lib o'tgan kishi kirishi mumkin edi.

O'ylaymanki, o'ta uddaburon firibgarlar bu chiptalarni ham qalbakilashtirishga harakat qilishadi. Shuning uchun chiptaning ko'rinishiga etibor bering: U silliq, biroz yaltiroq tuzilishga ega bo'lishi kerak. OFK va OFK Osiyo saralashining ramzlari yorug'likda ko'rinadi. Har bir chiptaning o'ziga xos QR-kodi va pastki qismida shtrix-kodi (stadionga kirishda uzib olinadigan "koreshok") mavjud. Qo'ldan chipta sotib olishda ehtiyot bo'ling.

Chiptalarni oflayn sotish g'oyasi qanchalik asosli bo'lsa, shunchalik noqulay. Agar u mamlakatning boshqa hududidan bo'lsa, chiptani qanday sotib olish mumkin? Yoki Qozog'istonlik jurnalist hamkasblar kabi boshqa davlatdanmi? Axir odamlarning ishi bor, ko'pchilik 2-3 soat vaqtini bekorga olib ketolmaydi.

Yana shuni qo'shimcha qilamanki, chiptalar bir kishiga 4 tadan ko'p sotilmaydi. Chipta narxlari ham elon qilinmadi: ikkinchi yarus chiptalari narxi 75 ming so'mdan 100 ming so'mgacha.

Oxirida o'zimdan ham qo'shib qo'yaman. Agar chipta sotib olishga borsangiz, iltimos, navbatsiz kirmang. Tartibga rioya qiling, o'zingizni va atrofdagilarni hurmat qiling. Yoningizda turgan odamlar ham sizga o'xshab chipta olgani kelishgan. Navbatda turganlarning barchasi stadionga borib, O'zbekiston terma jamoasi o'yinini tomosha qilishni istaydi.

Nikolay Egorichev