"Neftchi" bilan hali shartnoma imzolamadim, lekin men shu erdaman" - Oliver SHarkich jamoadagi taqdiri, "Paxtakor" va CHeran haqida

Bugun tushlikdan so'ng jamoa azolari mashg'ulotni yashil maydonda olib bordi. Yig'inning boshida jamoaga kelib qo'shilgan Oliver SHarkich hamon shu erda bo'lib turibdi. Uning "Neftchi"dagi taqdiri qanday bo'ladi? Jamoada qoladimi? SHu va boshqa savollar bilan SHarkichga yuzlandik. 

- "Neftchida"siz va jamoa bilan mavsumga tayyorgarlik jarayonini o'tayapsiz... 

- Bu haqida keyinroq gaplashganimiz maqul, deb o'ylayman.  CHunki, hali xam rasmiy shartnomaga imzo qo'ymadim, klub tomonidan hujjatlar tayyorlanyapti. SHu sabab hali rasmiy kelishuvga erishmadik, lekin men hozir jamoadaman.

- Yangi jamoangiz haqida taassurotlaringiz bilan bo'lishsangiz?

- Jamoa yaxshi, sheriklarim ham ajoyib, menga hammasi yoqyapti.

- Siz o'tgan mavsum "Paxtakor"da o'ynadingiz, mavsum so'ngida esa "Paxtakor" chempionlikka erishdi...

- Men o'tgan mavsumning yarimini "Paxtakor"da o'tkazdim. Afsuski,  iyun oyida esa jarohat oldim. Men u erda yoqimli damlarni o'tkazdim. Jamoadoshlarim bilan ancha yaxshi chiqishib ketgandim, ular xam meni yoqtirib qolishgan edi. Lekin Maksim SHackix o'z qarorini qabul qilib bo'lgandi. Biz bir-birimizni yaxshi tushuna olmadik, shu sabab eng to'g'ri qaror shartnomani bekor qilish edi. Do'stlarim uchun xursandman ular chempion bo'lishgani meni quvontiradi.

- CHeran bilan yaxshi do'st bo'lib qolgan edingiz. Maydonda o'zaro tushunishingiz ham yomon emasdi...

- Ha, CHeran bilan yaxshi do'stmiz, hali hamon u bilan aloqadaman. U menga yangi davlatga ko'nikishimga katta yordam berdi. Ko'p narsani tarjima qilib yordamlashardi. 

- Yangi mavsumni "Neftchi"da boshlashingiz qanchalik aniq?

- Hali aniq emas to'g'risi. Ammo xech narsani inkor qilib bo'lmaydi.