-Bugun uchrashuvda o'z darvozamiz to'ridan tezkor gol o'zkazganimiz rejalarimizni buzib yubordi, - deya so'z boshladi Hamidjon G'ulomovich. - Qolaversa, tajribali himoyachi Alisher Yusupovning kutilmaganda jarohatlangani tufayli majburiy o'zgarishni amalga oshirdik. Garchi, yutqazgan bo'lsak-da, yigitlar maydonda yomon harakat qilishmadi. Xatolar va nuqsonlar yo'q emas. Biz ishlashda davom etamiz.
Afsuski, tarkibimizdagi legionerlarning barchasi birdek ishonchimizni oqlay olmayapti. Faqatgina Vyacheslav Shevchenkoni aytmaganda, qolganlari bilan jiddiyroq gaplashib olishimiz zarurga o'xshayapti. Muxlislar va jamoamiz xomiylari oldimizga katta talablarni qo'ymoqda. Shunga munosib bo'lishimiz lozim. Balki, davralar oralig'igacha ayrim legionerlar xizmatidan voz kecharmiz?!
Bundan uch yil avval “Qizilqum” futbol klubini qabul qilib olganimda, jamoa chempionat jadvalining oxirgi pog'onasida edi. Hozir esa futbolchilarimiz mamlakatimiz yetakchi klublari bilan tengma-teng o'ynashga intilyapti. Shuni unutmaslik kerakki, hech bir klub chempionlikni yoki katta g'alabalarni osonlikcha qo'lga kiritmaydi. Murabbiylar shtabimiz va jamoa a'zolarining ahilligi evaziga natijalarni yaxshilashga intilyapmiz. Hali qiladigan ishlarimiz juda ko'p. Selekciya borasida ham jiddiy rejalarimiz bor. Davralar oralig'ida bir qator kuchli futbolchilarni tarkibga jalb etishni mo'ljallayapmiz.
Hamza Karimov hamda “Nasaf” mavzusi oxirgi paytda juda ko'p gapirilmoqda. “Nasaf” jamoasi shani xususida faqat iliq fikrlar aytishim mumkin. Futbol klubimiz veb-saytida ham ortiqcha gaplar yozilmagan. Hamza Karimov bilan o'tgan mavsum oxirida og'zaki kelishuvga erishganmiz. Ammo futbolchi jarohatim bor, tuzalsam mayli jamoangizda o'ynayman degandi. U erkin agent bo'lgach, viza masalalarida muammolari borligini eshitdim. Amalda u klubimiz bilan shartnoma imzolamagan bo'lsa-da, avvalo insoniylik nuqtayi nazaridan unga yordam qo'lini cho'zdik, xolos. Hammasi ortda qoldi. Hamza Karimov kuni kecha Germaniyada jarrohlik amaliyotini muvaffaqiyatli o'tab keldi. Har qanday vaziyatda bu kabi mohir futbolchilarga ko'mak berishni o'z burchim, deb bilaman.
“Qizilqum” PFK Matbuot xizmati.
