Braziliya – Gollandiya o'yiniga oid 5 ta qiziqarli fakt

Quyida etiboringizga bugungi o'yin ishtirokchilariga oid qiziqarli 5 ta faktni havola qilamiz.

1) JCH-2014 yarim finalidan o'rin olgan Argentina – Gollandiya o'yini Jahon chempionatlari tarixiga durang (asosiy va qo'shimcha bo'limlarda hisob ochilmagandi) qayd etilgan uchrashuv sifatida kiritildi. Penaltilar seriyasidagina omad Argentinaga kulib boqqandi. Demak, Gollandiya ushbu mundialda hali mag'lubiyatga uchramagan jamoa bo'lib qolmoqda. SHuningdek, Kosta-Rika, Argentina va Germaniya ham hali Braziliyadagi JCHda mag'lubiyatga uchramagan.

2) Braziliya o'zi mezbonlik qilayotgan jahon chempionatida eng ko'p gol o'tkazib yuborgan – 11 ta. Kamerun va Avstraliya terma jamoalari o'z darvozalaridan 9 ta to'p olib chiqishgan. So'nggi bor 1938 yilgi mundialda braziliyalik futbolchilar 11 ta gol qo'yib yuborishgan edi. SHu paytgacha hech bir mezbon terma jamoa qolgan ishtirokchilardan ko'p to'p o'tkazib yubormagandi.

3) Gollandiya terma jamoasi uchun 9 ta jahon chempionatlaridagi so'nggi uchrashuvlar mag'lubiyat bilan yakunlangan.

4) Braziliya terma jamoasi JCHlarda 3-o'rin uchun o'yinda uch marotaba maydonga tushgan: 1938 yili ular SHveciyani 4:2 hisobida mag'lub etishgan, 1974 yili Polshaga 0:1 hisobida yutqazishgan, 1978 yili esa Italiyadan ustun (2:1) kelishgan.

5) Ushbu mundialdagi Gollandiya terma jamoasi ishtirokidagi 3 ta o'yinda uchrashuvning eng yaxshi futbolchisi raqib jamoa darvozaboni bo'lgan: Gilermo Ochoa (Meksika), Keylor Navas (Kosta-Rika) va Serxio Romero (Argentina).