Ризо Айвазов: "Нефтчи" сафида кўплаб голлар ўрмоқчиман"

1995 йил таваллуд топган ҳужумчи ўтган мавсумни "Истиқлол" сафида муваффиятли ўтказди. Мисол тариқасида Айвазов "Истиқлол" таркибида 10 та ўйин ўтказиб 17 марта рақиблар дарвозасини ишғол этиб  яна "Нефтчи" мураббийларининг эътиборини тортди. Ризо эндиликда жамоадаги Шерзод Ҳакимов, Отабек Исроилов ва Мўйдин Мамазулумов каби тажрибали ҳужумчилар билан бир жамоа сафида ўйнайди. Бу эса ўз-ўзидан Айвазов учун кўп нарсани англатади. Ёш ҳужумчи "Нефтчи" ПФК билан шартнома имзолаганидан сўнг жамоанинг интернетдаги расмий сайти учун интервью берди.

- "Нефтчи" сафида тажрибали ўйинчилар йиғилган. Мен улардан кўп нарса ўрганмоқчиман. Жамоанинг ҳар бир аъзоси сингари мен ҳам "Нефтчи"нинг ғалабаларида, салмоқли натижаларида ўз ҳиссамни қўшмоқчиман. Ҳали ёшман. Шундай экан маррани кенгроқ олиб МТЖмиз вакили бўлиш учун астойдил ҳаракат қилмоқчиман.  Ўзимдан анча тажрибали ва маҳоратли футболчилар билан машғулотлар менга кўп нарса беряпти. Рақобатдан қўрқмайман. Соф рақобат бор жойда ўсиш кузатилади. Андрей Фёдоров билан гаплашдим. Мураббий кўп нарса ўзимга боғлиқ эканлигини таъкидлади. Мухлисларга эса саломатлик тилайман. Ишқибозлар ҳам бизнинг жамоамиз аъзоси ҳисобланишади. Бежизга уларни 12-ўйинчи дейишмайди, - деди Айвазов.