Ўзбекистон терма жамоасида ўйнаган қорақалпоғистонлик футболчиларни биласизми?

Қуйида ана шу футболчиларнинг кўрсаткичлари ҳақида тўхталиб ўтамиз.

1. Бердах Алланиязов. 8 ўйин
Алланиязов 1992 йили Қирғизистон билан учрашувда термадаги илк ўйинини ўтказиб, ўз дарвозаси даҳлсизлигини сақлаб қолди. Умуман олганда посбон ўша йили 4 учрашувда 4 та гол қўйиб юборди. 1994 йил ҳам Бердах 4 та ўйинда дарвозани қўриқлаб, 3 та баҳсни "қуруқ" ўтказиб, терманинг Осиё ўйинларидаги муваффақиятига ўз ҳиссасини қўша олди.

2. Неъматулла Қутибаев. 14 ўйин - 5 гол
Қутибаев терма жамоадаги дебютини 1998 йили Ҳиндистонга қарши кечган ўртоқлик учрашувида нишонлаган. 0:0 ҳисоби қайд этилган ўйинда у тўлиқ 90 дақиқа ҳаракат қилган. Неъматулла орадан 3 кун ўтиб Ҳиндистонга қарши кечган такрорий ўртоқлик учрашувида термадаги илк голини урди. У термадаги учинчи ўйинини Осиё ўйинлари доирасида Мўғулистонга қарши ўтказиб "хет-трик"ка эришди. Шунингдек Туркманистонга қарши кечган драматик ўйинда гол уриб, термамизга бир очко тақдим қилди. Дастлабки 5 ўйинда 5 та гол урган ҳужумчи, шундан кейинги 9 та учрашувда бирорта ҳам гол ура олмади. Қутибаев термадаги сўнги ўйинини 2002 йили Словакияга қарши ўртоқлик учрашувида ўтказди.

3. Наврўз Алимов. 11 ўйин - 2 гол
Наврўз 2014 йили Тошкентда Уммонга қарши кечган тўқнашувда термада дебют қилди. У миллий жамоа либосидаги дастлабки 7 та ўйинда бирорта ҳам гол урмади. Кейинчалик БААга қарши ўйинда илк голини урган бўлса, Иордания билан тўқнашувда иккинчи голига муаллифлик қилди. 2014 йил давомида ўртоқлик учрашувларида 11 учрашувда 2 та гол урган ҳужумчи 2015 йили "Пахтакор"га йўл олди ва шундан сўнг термада чақирилмади. Боз устига унинг фаолиятида пасайишлар даври бсоҳланди.

4. Саламат Қутибаев. 3 ўйин
Саламат 2016 йилдан буён мунтазам равишда терма жамоага жалб этилиб келинмоқда. Бироқ кўпинча у ўйинларни захирда ўтириб томоша қилишига тўғри келди. Шунга қарамай Бабаян Қутибаевни 3 марта захирадан ўйинга тушдирди. Ярим ҳимоячи дебют учрашувини Канадага қарши ўтказди. Шундан сўнг у Буркина-Фасо ва Грузия термалари билан ўйинларда ҳам захирдан ўйинга қўшилди. Эътиборли жиҳати Саламат 3 та ўйинни 3 та қитъа вакилига қарши ўтказди ва Осиё жамоалари билан ўйинларда майдонга тушмади.

Фурқат Юсупов тайёрлади