Янги қиёфадаги “Марказий” стадион яна мухлисларни ўз бағрига чорлади+ФОТО

Ташриф доирасида Қарши шаҳридаги "Марказий" стадионга борган давлатимиз раҳбари  стадионни реконструкция қилиш, спортчилар ва томошабинлар учун қулайликларни янада ошириш, хавфсизлик чораларини кучайтириш бўйича зарур тавсиялар берганди.  Орадан роппа роса бир йил ўтиб, 2017 йилнинг 30 июнь санасида "Марказий" стадион янги қиёфада мухлисларни ўз бағрига чорлади.

Бир йилга яқин давом этган қурилиш-таъмирлаш ишларидан стадион замонавий кўриниш касб этди. Илгари 16 минг мухлисни ўз бағрига сиғдирган стадионда эндиликда 22 мингдан ошиқ томошабин футбол учрашувларини томоша қилиш имкониятига эга бўлишди. Стадион минбарлари Европанинг замонавий стадионларидаги сингари футбол майдонига яқинлаштирилди. Қурилиш-таъмирлаш ишлари “Насаф” жамоаси муассиси, юртимиздаги йирик саноат корхонаси ҳисобланмиш Шўртангазкимё мажмуаси қурилиш бригадаси томонидан амалга оширилди.

Ўзбекистон кубоги чорак финали доирасида “Насаф”-“Қўқон-1912” жамоалари учрашуви айнан ушбу стадионда бўлиб ўтди. Бунгача таъмирлаш ишлари боис “Насаф” футболчилари уй учрашувларини Ғузор “Марказий” стадионида ўтказиб келишаётганди. “Насаф”чилар жорий мавсумда Қаршида ўтказилган илк учрашувда рақибларини йирик ҳисобда мағлуб этиб, стадионга йиғилган кўп минг сонли мухлисларни хурсанд этишди. Умид қиламизки, ушбу муҳташам иншоот йиллар давомида қаршилик спортсеварларнинг севимли масканига айланади ва улар бу ерда ўз жамоаларининг кўплаб ғалабаларига гувоҳ бўлишади.

Азиз НУРИЙ.

Суратлар муаллифи -Сардор НУРОВ ("Насаф" ПФК матбуот хизмати).