«Сурхон»га ким бош мураббий бўлади?

Сурхондарё вилояти ҳокими Эркинжон Турдимов бошчилигида навбатдан ташқари йиғилиш ўтказилди. Унда вилоят футбол федерацияси раҳбарияти, «Сурхон» футбол клуби аъзолари иштирок этди.

Йиғилишнинг кун тартибидан ўрин олган асосий масала, «Сурхон» жамоасига янги раҳбар тайинлаш ва жамоанинг янги мавсумга муносиб тайёргарлик кўриши бўлди.
Аввал хабар берганимиздек, бунгача жамоа бошлиғи сифатида ишлаб келган Эркин Холбобоев истеъфога чиқарилди. Эндиликда ушбу лавозимда Хайрулла Нуруллаев фаолият олиб борадиган бўлди.

2017 йилги мавсумда жамоа натижаларига масъул бўлиб келган бош мураббий Сергей Ковшов келгусида Қувасойнинг «Цементчи» жамоасида ишлашга қарор қилди.
Шундай экан эндиликда «Сурхон»га янги бош мураббий тайинланади. Хўш, бу борада раҳбарият қайси номзодда тўхталади?

Айтишларича, ҳозирда термизликлар Вали Келдиев ва Абдусамад Дўрмонов билан музокара ўтказмоқда. Келдиев Ҳаққулободнинг «Норин» жамоасини бошқариб келаётганди. 

Бугун унинг жамоаси ўқув-йиғин машғулотларини бошлайди. Шунинг учун ҳаққулободликлар Келдиевни кутмоқда. Дўрмонов эса сўнгги бор, Фарғонанинг «Нефтчи» жамоасида ёрдамчи мураббий сифатида ишлаганди.

Аммо сурхондарёлик ишқибозлар бошқарув постига «Сўғдиёна»нинг собиқ мураббийи Даврон Файзиевни келишини истамоқда.

Кўрамиз, янги раҳбарият қайси мураббийнинг номзодида тўхталар экан?