“Сурхон” лагеридан дараклар

Яқинда жамоада бош мураббий ўзгаргани ҳақида хабар бергандик. Эндиликда жамоа натижаларига Дилшод Нуралиев жавоб беради. Бош мураббийга эндиликда Руфат Акрамхўжаев ва Икром Ибрагимов ёрдам берадиган бўлди. Уларнинг сафи келгуси ҳафтада яна биттага кўпайиши кутилмоқда. Бугун машғулотларга катта мураббий Акрамхўжаев бошчилик қилди. Нуралиев Тошкентдаги айрим юмушларини ҳал этиб, эртадан Термизга бориб, расман ишга киришади.  

Таркибда ўттиз нафардан зиёд футболчи шуғулланмоқда. Машғулотлар ҳозирча кунига бир маҳалдан ўтказиляпти. Мураббийларнинг режасига кўра, “Сурхон” ўз қароргоҳида ушбу ҳафтанинг сўнггига қадар йиғин ўтказади. 12 февралдан термизликларнинг ўқув-йиғин машғулотлари Тошкентга кўчади. Унга қадар мураббийлар ихтиёридаги футболчилар саралаб олинади. Пойтахтдаги йиғин чоғида селекция ишлари олиб борилиши устувор вазифалардан бири сифатида белгилаб олинди. Жамоа бу йил ўз олдига супер лигага чиқиш вазифасини қўйган. Шунга монанд таркибни кучайтириш мақсадида айни дамда бир қатор тажрибали футболчилар билан музокара олиб борилмоқда. Лекин айнан қайси футболчилар эканлиги ҳозирча ошкор этилмаяпти.