Сотиш ҳам санъат

Аммо замонавий футболнинг қонуни шундай - кимдир харид қилади, бошқаси аксинча, футболчиларни имкон қадар баландроқ нархда пуллашга интилаверади. Soccer.ru сайти шу масалага алоҳида ёндашиб, Европа клубларининг 2010 йилдан кейин амалга оширган олди-сотдиларини текшириб чиқиш асносида энг устамон сотувчилар рейтингини шакллантирди. Ўйлаймизки, молияга боғлиқ қизиқарли фактлар сизларни ҳам бефарқ қолдирмайди.

11-ўрин - «СЕВИЛЬЯ»: 349 миллион евро

Элит рўйхатни Испаниянинг «Севилья» клуби бошлаб беради. Эътиборлиси, мазкур жамоанинг Мончи каби ишбилармон спорт директори борки, у ўткир ақли эвазига трансферлардан ҳеч қачон зиён кўрмайди. Бунга исталганча мисоллар келтириш мумкин. Масалан, атиги 2,5 миллионга харид қилинган Иван Ракитич «Барселона»га 18 «лимон» эвазига берилди. Гари Меделга эса 3 миллион евро сарфланганди ва унинг ортидан 13 «лимон» санаб олинди. Кондогбианинг трансфери 4 «лимон»га тушганди, унинг сотувидан 20 миллион қолди. Кевин Гамейронинг нархи 7,5дан 32 миллионга ошди, 7 000 000 еврога  харид қилинган Карлос Бакка эса 30 «лимон»га сотилди. Бундай футболчилар сирасига яна Криховяк, Видаль, Негредо, Хесус Навас, Касерес ва бошқаларни киритиш мумкин. Муҳими, «Севилья» мунтазам равишда ҳар бир футболчини харид қилинган нархга нисбатан анча қимматроққа сотишни уддалайди. Хуллас, Андалусия клуби 2010 йилдан буён фақат трансферларнинг ўзидан жуда катта маблағ топди! Бу орада жамоанинг Европа Лигасида нақ 3 марта зафар қучганини ҳам айтиш жоиз.

10-ўрин - «ЧЕЛСИ»: 358 миллион евро

«Челси»даги вазият бироз бошқача. Лондонликлар 2010 йилдан буён футболчилар сотувидан 358 миллион евро олишган, лекин шунинг баробарида харидлар учун нақ 871 «лимон» сарфлашди. Айтиш ўринли, «Челси» футболчилар харидига маблағ сарфлаш, яъни «пул тўла қопчиқ» танловида 2-ўринда турибди. Ачинарлиси шундаки, лондонликлар кўпинча бирор-бир футболчини арзон-гаровга сотиб юборишади-да, кейин бармоқларини тишлаб қолишади. Де Брюйне ёки Лукаку билан бўлган воқеаларни эсланг! Ёки Матични олайлик: бу футболчи аввалига кераксиздек туюлди ва «Бенфика»га жўнатилди, кейин эса сотилган нархига нисбатан 5 баравар қимматига қайтариб олинди. Нима ҳам дердик, бу - «Челси», бу - Абрамович...

9-ўрин - «РЕАЛ»: 361 миллион евро

Кимдир айтиши мумкин: «Реал» - «пул тўла қопчиқ»! Ҳа, чиндан ҳам, «Қироллик клуби» керакли футболчи учун қанча керак бўлса, шунча сарфлашга қодир. Бироқ унутмаслик керак, бу жамоа ўзи иштирок этадиган ҳар қандай мусобақада фақат ғолибликни кўзлайди ва бунинг учун таркиби шунга яраша бўлиши шарт. Тўғри, адолат юзасидан айтганда, «Реал»нинг сарф-харажатдаги камомади, яъни -283 миллион евролик кўрсаткичи «Барселона»га тегишли бундай натижа олдида мисоли «ҳолва». Зеро, каталонияликлар 2010-2016 йиллар оралиғида янги футболчилар учун «Реал»га кўра, 100 миллион евро кўпроқ сарфлашди. Ачинарлиси, ФИФА яқинда «Реал»га нисбатан трансфер  тақиқини қўллади ва энди мадридликлар янада тежамкор бўлишлари аниқ.

8-ўрин - «РОМА»: 367 миллион евро

Римнинг «Рома»си ҳам рўйхатдаги аксарият жамоалар каби харидлар учун кўпроқ пул сарфлайди. Бироқ ҳар бир янги футболчи «бўрилар»га кутилган даражада наф келтиравермайди. Шу боисми, «Рома» XXI асрнинг иккинчи 10 йиллигида ҳали бирор совринга эга чиқмади. Ким билади, балки яқин орада барчаси бутунлай ўзгариб кетар... Бу энди вақт ҳукмига ҳавола. Умумий қараганда, клубнинг собиқ етакчилари - Пьянич ва Бенатиянинг катта сумма  эвазига сотилгани адолатли бўлди. Бироқ уларсиз жамоанинг ишлари юришмай қолгани ҳам рост...

7-ўрин - «ТОТТЕНХЭМ»: 369 миллион евро

«Тоттенхэм»нинг харидлар учун сарфлаган пули миқдори футболчилар сотувидан тушган даромадга қараганда, деярли 100 миллион евро кўп. Лекин бу Англия клублари учун зиён ҳисобланмайди. Энг қизиғи, «шпорлар» «Реал»ни ўзларига шунчалик маҳлиё қилишганки, испан клубининг Модрич ва Бэйл трансфери учун «чўнтаги»ни анча «чуқур» ковлашига тўғри келди. Умуман олганда, «Тоттенхэм»нинг трансферлар сиёсати ҳавасга арзигулик. Чунончи, лондонликлар 6 йилда ўртача ва майда келишувларнинг ўзидан 200 миллион топишди.

6-ўрин - «АТЛЕТИКО»: 377 миллион евро

«Атлетико» сўнгги йилларда Европанинг топ-клубларидан бирига айланиб олди ва бу табиийки, сарф-харажатнинг ортишига олиб келади. Чунончи, «матрасчилар» ўз таркибларини кучайтириш йўлида анча тер тўкишгани натижасида ЕЧЛ финалида 2 марта иштирок этишди. Шубҳасиз, айни вақт клуб олдидаги вазифалар сезиларли даражада жиддийлашган. Демак, яқин орада «Атлетико» таркибидаги бирор юлдузнинг сотилишига гувоҳ бўлишимиз қийин. Эҳтимолки, худди шу ҳолат клубнинг «донор»лар сафидан чиқиб кетишига сабаб бўлгандир...

5-ўрин - «ПОРТУ»: 382 миллион евро

Мана, ниҳоят, рейтингдаги бош қаҳрамонлар - футболчилар савдосидан улкан фойда кўрадиган португал клубларига ҳам навбат келди. Жумладан, «Порту» 2010-2016 йиллар оралиғида харидлар учун 200 миллион сарфлади-да, бундан деярли икки баравар кўп соф фойда кўрди. Мангала, Алекс Сандро, Данило, Жексон Мартинес, Хамес Родригес, Моутиньо, Халк... Булар - фақат танилган футболчилар, холос. Кенг оммага унча танилмаган, аммо «Порту» ғазнасини бойитган футболчилар ҳам кўп.

4-ўрин - «Бенфика»: 414 миллион евро

Тақдирнинг ҳазилини қарангки, «Бенфика» ва «Порту» клублари шу рейтингда ҳам ёнма-ён туришибди. Биргина фарқ шундаки, «бургутлар» трансферлар учун ашаддий рақибларидан кўра, кўпроқ пул сарфлашган ва ўз навбатида, олинган фойда ҳам уларда «Порту»никидан 30 миллион зиёд. Зеро, «Бенфика» ёзда Ренату Саншеш ва Николас Гайтанни яхшигина суммада пуллади. Улардан аввал эса ди Мария, Давид Луиз, Рамирес, Коэнтрау ва Матич топ-клублар даражасига етишганди. Эътиборлиси, «Бенфика» рус клублари билан ҳам мустаҳкам алоқа ўрнатган. Бунинг натижаси ўлароқ, Аксель Витцель учун Санкт-Петербургнинг «Зенит» клубидан 40 миллион евро олинди.

3-ўрин - «ЮВЕНТУС»: 415 миллион евро

Аслини олсак, «Ювентус»нинг харидлари ҳажми сотувга нисбатан 200 миллион евро кўп. Бироқ 2010 йилдан буёғига клуб ихтиёридаги футболчиларнинг нархлари сезиларли даражада ўсди. Тўғри, «кекса синьора»нинг йирик савдоларини санашга битта қўлнинг бармоқлари ҳам етади. Аммо гап шундаки, грандларга сотилган Погба ва Моратанинг нархини дунёнинг унча-мунча бақувват клублари кўтаролмасликлари ҳам бор гап. Айтганча, юқоридаги икки футболчи ёнига яна Артуро Видални қўшиб қўйиш лозим. Негаки, «Бавария»нинг чилилик ярим ҳимоячига эга бўлиш йўлида катта маблағдан воз кечгани барчага аён. Туринликлар томонидан сотилган бошқа футболчилар унчалик эътиборга арзимасликлари мумкин. Бироқ энг муҳими, «Юве» трансферлар масаласига жиддий қарамоқда ва бу ўз навбатида, наф келтира бошлади.

2-ўрин - «ВАЛЕНСИЯ»: 432 миллион евро

«Валенсия» бир неча йиллардан буён шов-шувли натижаларга эришмай, ишқибозлари кўнглини оғритишга ҳам улгурди. Бироқ жамоанинг савдо-сотиқ ишлари ҳамон бир текис кетмоқда. Жумладан, «кўршапалаклар» ўтган ёзнинг ўзида Шкодран Мустафи, Андре Гомеш ва Пако Алькасерни 100 миллиондан кўпроққа сотишди. Олдинроқ эса испанияликлар Отаменди, Матьё, Сольдадо, Мата ва Вильянинг сотувидан катта фойда олиб, «Атлетико»дан фарқли равишда, «донор»лар қаторида қолишганди. Дарвоқе, «Валенсия» 2010 йилдан буёғига фақат трансферларнинг ўзидан соф 100 миллион евро даромад қилди. Демак, клубнинг молиявий кўрсаткичлари чакки эмас.

1-ўрин - «ЛИВЕРПУЛЬ»: 442 миллион евро

Агар ливерпулликлар таркибни янги футболчилар билан бойитиш учун кейинги 6 йилда жами 663 миллион евродан воз кечишганини ҳисобга олсак, даромад ва буромад ўртасидаги фарқ  -221 кўринишида. Бошқача айтганда, «қизиллар»нинг футболчилар учун сарфлаган маблағлари фойдага нисбатан анча кўп. Бироқ бу жамоа вакиллари шундай ёрқин ва сержило ўйин кўрсатишадики, харидорлар улар учун унча-мунча харажат бетига қарашмайди. Мисол учун, Раҳим Стерлинг, Луис Суарес ва Фернандо Торреснинг сотилиши туфайли клуб ғазнаси 200 миллион еврога бойиган. Энди бу ҳисобга Хавьер Маскерано ва унинг «Барселона»га қилинган трансфер суммаси - 20 «лимон»ни қўшамиз. Натижани кўринг ва ҳавас қилинг: 4 нафар футболчининг сотуви умумий фойданинг тенг ярмини қоплаяпти. Бу - «Ливерпуль», азизлар...

И.РАҲИМОВ тайёрлади