Шоҳруҳ Гадоев "Насаф" қароргоҳини тарк этган

Шоҳруҳ Гадоев шу кунга қадар "Насаф" жамоаси билан машғулотларда иштирок этаётганди. Бироқ футболчи янги мавсум учун "Насаф" клуби билан шартномани узайтирганича йўқ. Куни кеча иқтидорли футболчи клуб лагерини тарк этган. Бугун ҳам Шоҳруҳ Гадоев "Насаф" машғулотларида кўриниш бермаган.

Шоҳруҳ Гадоевга Баҳрайн клуби ва Тошкентнинг икки гранд жамоалари "Локомотив" ҳамда "Бунёдкор" томонидан ҳам жиддий қизиқиш бўлаётганди.  

"Насаф" клуби раҳбарияти ҳам Шоҳруҳ Гадоевга янги шартнома таклиф қилаётганди. Аммо томонлар ҳали келишувга эришишмаган.

Қайд этиш лозим, ўтган мавсумнинг охирида "Пахтакор"га қарши баҳсдан сўнг "аждарлар" бош мураббийи Рўзиқул Бердиев Шоҳруҳ Гадоевнинг ўйинларидан кўнгли тўлмаётгани ва Гадоевнинг ўйинларини мақтаётганларни футболни тушунмаслиги ҳақида матбуот анжуманида алоҳида тўхталганди.

Айни пайтда Шоҳруҳ Гадоев олдида бир қанча вариантлар мавжуд. Тез орада футболчи янги мавсумни қаерда бошлаши маълум бўлади.