Отаси футболчи бўлишини хоҳламаган, "Манчестер Сити"га қарши ўйиндан сўнг тақдири ўзгарган ва яйловдан Чемпионлар лигасига йўл олган "Андижон"нинг янги легионери билан яқиндан танишамиз
15 фев 12:24
Янгиликлар

Отаси футболчи бўлишини хоҳламаган, "Манчестер Сити"га қарши ўйиндан сўнг тақдири ўзгарган ва яйловдан Чемпионлар лигасига йўл олган "Андижон"нинг янги легионери билан яқиндан танишамиз

"Андижон" клуби черногориялик ҳимоячи Лука Ускокович билан шартнома имзолади.

Лука Ускокович 1996 йил 10 апрелда Черногорияда таваллуд топган. Футболчилик фаолиятини "Будучност" жамоасида бошлаган. Карьерасининг катта қисмини Словениянинг "Марибор" клубида ўтказган.

Отам мени футболчи бўлишимни хоҳламаган. Болалигимда маҳалладаги майдончаларда ва кўчаларида тинимсиз тўп кетидан қувлардим. Отамни Славко Влахович номидаги футбол мактабига боришга кўндирдим. Ўшанда тахминан ўн ёшда эдим. У ерда икки йилча шуғулланганман, кейин "Будучност" ёшлар жамоаси учун бир нечта ўйинчилар қаторида мени ҳам танлаб олди. Уйга дам олиш ва ўқиш учун қайтиш ўрнига, кўпроқ футбол билан шуғулланардим.
Забжелога келдим ва у ерда ярим йил яшаб қолдим. Шунингдек, футзал ўйнашни ҳам бошлаб юбордим. Кейинчалик менга Словениядан қўнғироқ қилишди. Нова Горицага кўчиб ўтишим керак эди, шу боис ўша ерга жўнаб кетдим.

Жамоасиз пайтим ўрмондаги яйловда шуғуллана бошладим, чунки мени чақиришларига ишонардим. "Будучност" менга ишонч билдирмаётганди, бироқ "Ёмон нарсанинг ҳам яхши томони бор" деганларидек, ўша пайтда Италиянинг "Парма" клуби филиали бўлган жамоа билан "Манчестер Сити"га қарши ўртоқлик ўйинида майдонга тушдим ва яхши ўйин кўрсатдим. Ўшанда инглизлар мураббийи Патрик Виейра эди (2013–2015 йилларда у U-23 жамоасини бошқарган — таҳририят). Мен Забжелодан бу ерга "Манчестер Сити"га қарши ўйнагани келгандим. Бироқ "Нова Горица" менга шартнома таклиф қила олмади. Шунда "Марибор" мен ҳақимда эшитиб, мени синовга чақирди. "Марибор" бутун Словениядан иқтидорли футболчиларни тўплайдиган клуб сифатида танилган. "Марибор"да етти кун бўлдим, сўнгра Черногорияга қайтдим. Тахминан 20 кундан кейин улар мени жамоага таклиф қилишди. Шунда синовдан ўтганимни ҳис қилдим.
Ўша пайтда "Марибор" ёшлар ўртасидаги Чемпионлар лигасининг гуруҳ босқичида иштирок этаётган эди. Мен бешта машғулотдан кейиноқ майдонга тушиб, барча олтита учрашувда иштирок этдим. Яйловдан тўғри Чемпионлар лигасига келдим.

Ускокович "Марибор"нинг ёшлар жамоасида тўп тепди, сўнгра иккинчи лигага ижарага берилди. Унинг таъкидлашича, иккинчи лигадаги ўйинлар орқали катта тажриба тўплади ва ижарадан қайтгач, "Марибор"нинг асосий жамоасида ўйнай бошлади.

Ишончли ўйинларидан сўнг унга "Ред Булл Зальцбург", "Страсбург", "Лех" ва бошқа жамоалардан таклифлар тушди, аммо айнан шу пайтда у дастлабки жароҳатига йўлиқди.

Гўё кимдир мени қарғагандек эди, майдонга тушишим билан тўсатдан товонимда оғриқ сездим. Шунда операция қилдиришим кераклигини тушундим. Бу жароҳат туфайли бир ярим йилимни йўқотдим.
Шундан кейин у яна бир жароҳат олди ва бир неча ой давомида тикланишга мажбур бўлди.
(Ўша пайтдаги мураббий) Мауро Каморанези мени А Серия даражасидаги футболчи деб айтди. Агар у каби буюк футболчи сизга шу гапни айтса, демак, сиз, албатта, нимагадир арзийсиз. Бу сўзлар мени янада кўпроқ, қаттиқроқ ва яхшироқ ишлашга ундади.

Миллий терма жамоага келсак, Ускокович ёшлар таркибида ўйнаган ва яқин келажакда асосий терма жамоа либосини кийишга умид қилмоқда.

"Ҳар бир футболчи давлат герби туширилган либосни кийишни орзу қилиши табиий ҳол. Шу боис мен терма жамоадан чақирув олиш учун қаттиқ меҳнат қиламан.

"Марибор" таркибида жами 75 ўйин ўтказган ва уч карра Словения чемпионига айланган Ускокович 2024 йилнинг ёзида клуб билан хайрлашиб, Латвиянинг "Лиепая" жамоасига ўтди.

Бу ерни тарк этаётганимдан афсусланаман, аммо футболчининг тақдири шундай. Ҳар биримиз ўз йўлимизда давом этамиз, лекин мен ажойиб давр ортда қолганини таъкидлашим жоиз. Бу ерда умр бўйи унутолмайдиган кўплаб дўстлар орттирдим. "Марибор" менинг иккинчи уйим ва доимо шундай бўлиб қолади. Клубга улкан муваффақиятлар тилайман, чемпионлик унвонини қайтарсин ва еврокубокларда омад ёр бўлсин. Афсуски, ҳамма нарса шунчалик тез содир бўлдики, жамоадошларим ва клубдаги барча билан хайрлашишга улгурмадим. Имкон пайдо бўлиши билан, албатта, бу ерга яна ташриф буюраман. Мен "Марибор" мухлиси бўлиб қоламан ва жамоа ўйинларини кузатиб бораман, ўзим эса Латвияда янги синовларни бошлайман.

Бироқ Луканинг Латвиядаги сафари тез якунланди. 2025 йилнинг январида 1,93 метр бўйга эга марказий ҳимоячи "Андижон" клуби билан шартнома имзолади.

Яхши кутиб олганинглар учун раҳмат. Жуда хурсандман ва бу ерда бўлишдан мамнунман. Мен жуда кўп маълумотлар йиғдим. Клуб ва шаҳар ҳақида яхши фикрлар эшитдим. Ўзбекистон чемпионати ҳақида асосан позитив фикрларни айтишди. Бу мен учун янги чақирув ва янги синов. Ўзбекистон чемпионатидаги саргузаштларим бошланишини интизорлик билан кутяпман.