Дарвозадан дарвозага гол урган, Милитао ва Бруну билан бир сафда турган ҳамда интервьюси туфайли хижолатда қолган "Пахтакор"нинг янги посбони билан яқиндан танишамиз

Жонатан Сикейра 1991 йилнинг 8 май санасида Бразилиянинг Сан Мигель Ду Оэсте шаҳрида туғилган. 10 ёшида "Гуарани" ёшлар жамоасида шуғуллана бошлаган. Орадан икки йил ўтиб, "Жоинвиль" академиясига кўчиб ўтди ва 2010 йил катталар жамоаси таркибига қўшилди. 2015 йил у "Операрио"га ижарага берилди. Ўша йилнинг март ойида у "Насионал"га қарши баҳсда ўз дарвозаси қаршисидан рақиб дарвозасини ишғол қилди в жамоасининг 2:1 ҳисобида ғалаба қозонишига ҳисса қўшди. 

ВИДЕО

Ўшанда ақлбовар қилмас воқеа юз берганди. Фаолиятимдаги дастлабки голни бундай тарзда таблога ёздиришни тасаввур ҳам қилмагандим. Гол бўлган вазиятда ёмғир рақибга қарши ишлади. Мен бундай зарбага ҳеч қачон махсус тайёргарлик кўрмаганман. Бир ҳамкасбим бу ўйин келажакда набираларимга сўзлаб беришга арзигулик ўтганини айтди.

Сикейра мавсум сўнгида Паранаэнсе чемпионати (Бразилиянинг Парана штатидаги лига)да ғолибликни қўлга киритди. 2017 йил 7 июлда Жонатан хорижга кўчиб ўтди ва Португалиянинг "Морейренсе" клуби билан икки йиллик шартнома имзолади.

"Жоинвиль" менинг иккинчи уйимга айланганди. Салкам 10 йил умримни шу клубга бағишладим. Нимага эришган бўлсам, "Жоинвиль" туфайли эришдим. Мен у ерни бошимни баланд кўтарган ҳолда тарк этаман, клуб бошдан кечирган яхши-ёмон лаҳзаларда боримни бахшида қилишга ҳаракат қилдим.

Жонатан "Морейренсе" сафида Португалия чемпионатидаги фаолияти давомида 2019 йил январь ойининг энг яхши дарвозабони сифатида эътироф этилган. Ўша ой Жоау Феликс энг яхши футболчи дея эътироф этилган бўлса, турли позицияларда Эдер Милитао, Бруну Фернандеш, Диего Соузалар пешқадамликни қўлга киритган.

Шунингдек, у Портулалия чемпионати доирасида "Порту"га қарши ўйиндан кейинги интервьюсида ноқулай аҳволга тушиб қолди. Гап шундаки, қуйи лигага тушиб кетмаслик учун курашаётган "Морейренсе" ва пешқадам "Порту" ўртасида учрашувнинг иккинчи бўлимига ҳакам томонидан қўшиб берилган сўнгги дақиқаларда Абдулмажид Уорис "аждарлар"ни ҳисобда олдинга олиб чиқди. Бироқ ёрдамчи ҳакам офсайдни кўрсатгани учун гол инобатга олинмади. Мазкур вазиятдан сўнг ўйин якунланди. Гол ўтказиб юбориш оқибатида майса устида ётган ҳолда қўлларини юзига қўйиб олган Жонатан ҳакамнинг якуний қарорини кўрмай, жамоасининг навбатдаги "мағлубияти"дан ҳафсаласи пир бўлиб, кийим алмаштириш хонасига йўл олди. 

Микст-зонада берган интервьюсида дарвозабон натижадан саросимага тушди. "Жамоамиз мазкур ўйинда очко олишга лойиқ эди, афсуски, буни уддалай олмадик". "Ўйин 0:0 ҳисобида якунланди. Сиз ўтказиб юборган гол инобатга олинмади", — тузатиш киритди мухбир. "Мен... учрашув сўнгида гол ҳисобланди деб ўйлабман... Энди бахтлироқман", дея жавоб берди у жилмайганча.

ВИДЕО

Кейинчалик Сикейра "Витория" ва "Риу Аве" клублари шарафини ҳимоя қилди. "Риу Аве" таркибида Сегунда (иккинчи дивизион) чемпионига айланди.

2025 йилнинг январида у Тошкентнинг "Пахтакор" клуби аъзосига айлнади ва Осиё Элит Чемпионлар лигаси доирасида Қатарнинг "Ал Гарафа" клубига қарши ўйинда расмий дебютини ўтказди.

"Бунёдкор" собиқ мураббийи қўл остида тўп тепган, Алиссон Бекерга яқин қариндош бўлган ҳамда сигир соғишни қойиллатадиган "Пахтакор"нинг янги легионери билан яқиндан танишамиз

"Мен Месси ёки супермэн эмасман" — ёши кичрайтирилгани гумон қилинган, 16 ёшида термада дебют қилган, Катанец қўл остида Ўзбекистонни мағлуб этган ва Аргентинага қарши ўйинда онасидан айрилган "Пахтакор"нинг янги легионери билан яқиндан танишамиз

Оқил Абдубарноев тайёрлади.