“Олмалиқ”да сермаҳсуллик нима учун пасайиб кетди?

Жамоа аввалига ўзининг янги стадионида пойтахт вилоятининг бошқа бир клуби “Металлург”ни қабул қилиб, қийинчилик билан бўлса-да 3:2 ҳисобида ғалаба қозонди. Кейин яна шу стадионда “Сўғдиёна” 4:2 ҳисобида мағлуб этилди. З-турда жамоа “Бунёдкор” меҳмони бўлиб, дурангга эришди. Лекин охирги икки турда “Олмалиқ” бирорта ҳам тўп кирита олмади. Хўш, сермаҳсулликнинг бирданига пасайиб кетиш сабаблари нимада? Бугун шу ҳақда мулоҳаза юритамиз.



АЖОЙИБ ЎТГАН ТАЙЁРГАРЛИК
“Олмалиқ” мавсумга тайёргарликни ҳар ҳолда яхши ўтказди. Жамоа йиғиннинг асосий қисмини Тошкентда олиб борди. Футболчилар кўпчилик ҳавас қиладиган “Ўзбекистон” меҳмонхонасида истиқомат қилишди. Машғулот ва ўртоқлик ўйинлари сунъий майдонларда ўтказилди. Февралда жамоа ҳатто Туркияда йиғин ўтказиб қайтди. Бу эса “Олмалиқ”нинг илк бор хорижда йиғин ташкил қилгани бўлди. Ўйлаймизки, Игорь Шквирин мавсумлар оралиғида ўзи хоҳлаган футболчиларни қўлга кирита олди. Хусусан Шаҳбоз Эркинов, Игорь Петкович, Нодир Давлатов, Георгий Квесиешвили, Маъмур Абдуллаев сингари кетганлар ўрни мос равишда Иқбол Акрамов, Александр Алимпиевич, Шерзод Ҳакимов, Шавкат Муллажонов, Абдуқаҳҳор Ҳожиакбаров каби ўйинчилар билан тўлдирилди. Бир сўз билан айтганда, мавсумга ҳозирлик яхши кечди.

КЎТАРИЛИШ ВА ПАСАЙИШ
Кейин эса чемпионат бошланди. Олий лига қуръаси натижаларига кўра, “Олмалиқ” дастлабки икки турни ўз майдонида ўтказадиган бўлди. “Металлург” билан очилиш ўйинида Олмалиқ шаҳрида қуриб битказилган янги стадион мухлислар билан лиқ тўлди. Натижада ўйин ҳам шунга яраша жонли кечди. Гарчи майдон эгалари кишига завқ улашадиган футбол намойиш эта олмаган бўлишса-да, бир амаллаб ғалаба қозонишди.  Ундан кейин жамоа “Сўғдиёна”ни мағлуб этди ва 2-турдан сўнг турнир жадвалида биринчи ўринга кўтарилиб олди. Шундан сўнг Тошкентга сафар қилган Игорь Шквирин шогирдлари амалдаги чемпион “Бунёдкор” билан 1:1 ҳисобида дуранг ўйнашди. Ундан кейин ўз майдонида “Андижон”н енга олмаган клуб 4-ўринга тушиб кетди. Ва кечаги турда “Пахтакор”га мағлуб бўлган “Олмалиқ” бирданига 7-ўринга тушиб қолди. Жамоанинг бу қадар пастга оғишида “Динамо” ва “Бухоро”нинг сафарда ғалаба қозонгани ҳам сабаб бўлди дея оламиз.



ИГОРЬ ШКВИРИННИ ЎЙЛАНТИРАЁТГАН ҲОЛАТЛАР
Айни пайтда Игорь Шквиринни бир нечта ҳолат чуқур ташвишга соляпти дея оламиз. Аввало жамоа ўйинида пасайиш юзага келгандек. Хусусан “Олмалиқ”нинг “Бунёдкор”га қарши кўрсатган шиддати “Пахтакор” билан ўйинда унчалик кўзга ташланмади. Жамоа гўёки ўз ўйинини йўқотиб қўйгандек таассурот қолдирди. Албатта, охирги уч турда атиги битта гол уриш “Олмалиқ” учун ярашмаган ҳолат. Биз биламизки, “Олмалиқ” ҳужумкор футболни ёқтиради ва кўпроқ голлар уришни хоҳлайди. Аммо охирги уч турдан бери бунинг иложи бўлмаяпти. Тўғри, “кончилар” охирги учта ўйиндан иккитасини Тошкентда, бунинг устига “Бунёдкор” ва “Пахтакор”га қарши ўтказишди, қолаверса бу жамоалар дарвозасига тўп киритиш осон эмас. Лекин жамоанинг нима учун ўз майдонида “Андижон”ни енга олмагани ҳайратланарли ҳолат. Бундан жаҳли чиққан клуб бош мураббийи ҳатто ўйиндан кейин матбуот анжуманига киришни хоҳламади. Эҳтимол, “Бунёдкор” билан ўйиндаги ижобий натижа футболчиларнинг бироз бўлса-да ҳаволаниб кетишига сабаб бўлгандир.

“Олмалиқ” бош мураббийи “Пахтакор”га қарши баҳсдан сўнг ўз фикрларини қуйидагича баён этди: “Пахтакор” бизга нисбатан ҳар жабҳада устунлик қилди. Мен жамоамнинг бундай ёмон ўйин кўрсатганидан ҳатто уялдим ҳам. Ўйиндаги охирги ўн дақиқани ҳисобга олмаганда, қолган пайтда ҳеч нарса қила олмадик. Қўпол қилиб айтганда, биз 85 дақиқа давомида футбол ўйнамадик. Мен ҳар доим шогирдларимга ўйин бошиданоқ ҳимояга ётиб олманглар деб кўрсатма бераман, рақиб ким бўлишидан қатъий назар. Лекин бугун бошқача бўлди: шогирдларимга ҳар қанча танбеҳ бермай, улар ўз билганича тўп тепишди. Масалан, 15-рақамда ҳаракат қилган ҳимоячимиз Обид Жўрабоев тўпни шерикларига узатаётганда ёш болаларча хатога йўл ққўйди. Мен 20 ёшимда энди футбол ўйнашни бошлаган кезларим ҳимоячи мана шундай тарзда хато қилса, ярим йил захирада ўтирарди. Ҳозир эса ўйинчи хато қилгани билан барибир кейинги баҳсларда майдонга тушяпти. Футболчи захирада қолиши учун унинг ўрнида ўйнай оладиган бошқаси янада зўр бўлиши керак. Шундагина ўйинчилар ўртасидаги рақобат шаклланиб боради”.

Юқорида айтиб ўтганимиздек, олий лиганинг дастлабки икки турида еттита гол урган жамоа кейинги учта ўйинда атиги битта тўп киритди. Хўш, бу нима билан боғлиқ? Клуб бош мураббийи бу борада шундай дейди: “Тўғрисини айтсам, шогирдларимга нима бўлаётганини ўзим ҳам тушунмаяпман. “Пахтакор” билан ўйинни олайлик, биз бутун 90 дақиқа ичида голга тортадиган нари борса иккита вазиятни юзага келтирдик. Бу эса жуда паст кўрсаткич ҳисобланади. “Андижон”га қарши беллашувда кўп имкониятларни кўкка совургандик. Бугун ўша вазиятларнинг ярмини ҳам юзага келтира олмадик”.



ЗАФАР ПОЛВОНОВ ҚАЧОН ГОЛ УРИШНИ БОШЛАЙДИ?
“Олмалиқ”нинг ўтган йилги тўпурари Зафар Полвонов жорий мавсумда ҳали бирорта гол ура олмади. Қаршилик ҳужумчи ўтган йил 14та тўп киритишнинг уддасидан чиққанди. Бу йил эса негадир ҳеч омади юришмаяпти. Полвонов бу йилги чемпионатда ҳозирча тўртта ўйинда иштирок этиб жами 278 дақиқа ҳаракат қилди. Бу эса ўртача ҳар бир ўйинга 70 дақиқа деганидир. Хўш, Зафар Полвонов қачон гол уради, ўзи умуман унга нима халақит беряпти? Бу борада “кончилар” устози Игорь Анатольевич шундай деди: “Зафар Полвоновга мавсум бошидан етарлича имконият бериб келиняпти. Аммо нима сабабдан ҳалиям тўп кирита олмаганини яхшиси ўзидан сўраш керак. Полвонов ўйин тақдирини бир ўзи ҳал қила оладиган футболчи эмас. Унинг яхши ўйин кўрсатиши кўп жиҳатдан ярим ҳимоячиларга, айниқса, қанотда тўп сурадиган ўйинчиларга боғлиқ. Унга вақтида тўп етиб келмаганидан кейин албатта Полвонов ҳам гол урмасдан юраверади. Лекин ҳар қандай сабрнинг ўз чегараси бор. Шу боис кейинги турларда Шерзод Ҳакимовга кўпроқ имконият беришни мўлжаллаб турибман. Мен Зафарга кўп марта айтдим: сен ҳужумчисан, ҳадеб ортга қайтмасдан олдинроқда тўпни кут, қачондир сенга етиб келади деб. Лекин у ўз билганидан қолмай, орқага қайтиб ҳужумни ўзи бошлаб, ўзи якунлашни истаяпти. Шундай бўлганидан кейин табиийки гол ура олмайди”.

ХУЛОСА ЎРНИДА
Мақолага хулоса сифатида шуни айтишимиз мумкин, “Олмалиқ” жуда ажойиб жамоа ва ҳар доим сифатли футбол кўрсатишга интилиб келган. Буни кўпчилик эътироф этса керак. Лекин шундай жамоанинг ўйинида бироз пасайиш юзага келгани вақтинчалик ҳолат бўлишиям мумкин. “Олмалиқ” бу йил таркиб борасида кучайишга эришди. Алимпиевич, Зуаги каби легионерлар ҳам чакки эмас экан. Қолаверса, таркибда ўйинни ўз қўлига ола биладиган Пиримов, Шоаҳмедов, Абибуллаев сингари ярим ҳимоячилар бор. Шундан келиб чиқиб жамоанинг кейинги ўйинларда ўзини кўрсатишига ишонса бўлади. Бунинг учун эҳтимол, тезкор футболчи Иқбол Акрамовни ҳам кейинги беллашувларда майдонга тушириш фурсати етгандир. Чунки “Нефтчи”нинг собиқ вакили “Олмалиқ”қа ўтганидан бери атиги битта ўйинда қатнашиб, 45 дақиқа тўп сурди.

Хайрулла Холиқов.