Олим Абдувасилов ҳакамлик фаолиятини якунлади

Хабарингиз бор, жорий мавсумда бир қанча таниқли ва тажрибали футбол ҳакамларимиз — Вадим Агишев, Дамир Искендеров, Жалгасбай Сарсенов ҳамда Бектурсин Канназаров фаолиятларини тугатишганди. Кечаги Ўзбекистон кубоги финал баҳсида бу мавсум фаолиятини якунлаган тажрибали ҳакамларимиз сони 5 тага етди.

20 йилдан зиёд вақт давомида ҳакамлик соҳасида фаолият кўрсатган, бош ҳакам ёрдамчиси сифатида қатор мавсумларни ўтказган Олим Абдувасилов ҳакамликдаги карьерасини якунлашга қарор қилди ва кеча кўзда ёш билан майдонни тарк этди. Финал сўнгида ўтказилган тақдирлаш маросимида унга алоҳида эҳтиром кўрсатилиб, миллий зарчопон ҳамда махсус эсдалик совғаси топширилди.

Олим Абдувасиловга футбол ҳакамлигидаги хизматлари учун ташаккур айтган ҳолда келгусидаги ишларига ривож тилаб қоламиз.