ЎФА МТЖ мураббийи масаласига изоҳ берди

ЎФА қачон терма жамоа бош мураббийи номини эълон қилади? деган жуда кўплаб саволлар ва мурожаатлар таҳририятимизга келиб тушмоқда. Минглаб мухлислар биз билан айнан шу борада боғланиб, ЎФАдан изоҳ олишимизни сўрашмоқда. Ҳар бир хабарлар тагида мухлислар Ўзбекистон терма жамоаси бош мураббийи масаласида изоҳ, яъни фикр қолдиришмоқда.

Сайтимиз ходимлари 3 кундан буён ЎФА матбуот хизмати бошлиғи Ёқубжон Бобожонов билан боғланиб, айни шу саволга жавоб олишга уриниб кўришди. Аммо ҳозирча аниқ бир номзод ҳақида изоҳ берилгани йўқ.

ЎФА матбуот хизмати хорижлик мураббийлар билан музокара кетаётгани ва яқин орада масала ҳал этилгач расман эълон қилиниши ҳақида маълумот берди. Аммо аниқ сана ёки номлар ошкор қилингани йўқ.

Биз ЎФА халқаро алоқалар бўлими бошлиғи Диёр Исамиддинов билан боғланишга уриниб кўрдик. Лекин ҳозирча бу уринишлар бесамар кетди. Айни пайтда хорижда бўлиб турган Диёр Исамиддинов хорижлик мураббий билан музокаралар ўтказаётгани айтилмоқда.