LaLiga. 9ta penalti tepilgan 20-turda "Qirollik klubi" o'ziga keldi (tur sharhi)

Aslanov Jasurbek

23 yanv 2018, 12:57

15 yildagi ilk 9ta penalti, "Deportivo" tufayli o'ziga kelib olgan "Qirollik klubi", Ronalduning qonli chexrasi va boshqa qiziqarli ma'lumotlarni LaLiganing 20-tur uchun atalgan sharhidan bilib olishingiz mumkin.

Ikkinchi davraning ilk turini "Xetafe" - "Atletik" o'yini ochib berdi. Uyda ochko to'plash bo'yicha xatto "Atletiko", "Vilyarreal" kabi klublardan yaxshiroq natija ko'rsatayotgan "Xetafe" bu safar ham ochko ishlab oldi, biroq 1 ochko. 2:2 hisobida yakunlangan o'yinning eng qiziq jihati - uchrashuvni boshqargan hakam Xesus Gil 3ta penalti belgiladi, ammo ularning 2tasi gol bilan tugadi. "Xetafe" vakili Xorxe Molina 11 metrlik zarbadan unumli foydalana olmadi.

Vinchenco Montella boshchiligidagi "Sevilya" asta-sekin o'ziga kelmoqda. Ispaniya Kubogida "Atletiko"ni mehmonda taslim qilgan sevilyaliklar LaLiganing 20-turida "Espanol" darvozasiga javobsiz uchta gol urishdi.

"Atletiko" - "Jirona" uchrashuvida tur sensaciyalaridan biri sodir bo'ldi. "Vanda Metropolitano"ga yig'ilgan "matraschilar" muxlislari jamoasining g'alabasini ko'ra olishmadi. Joriy mavsum juda yaxshi o'yin ko'rsatayotgan Kataloniyaning "Jirona" klubi Madriddan 1 ochko bilan qaytdi. Kataloniyaliklar vakili Kristian Portu 73-daqiqada Grizmanning birinchi bo'limda kiritgan goliga javob berdi va bahs 1:1 hisobida yakunlandi. Mezbonlar hujumchisi Diego Kosta ushbu uchrashuvda jarohat oldi va 10 kun maydonga tusha olmasligi e'lon qilindi.

Ikkinchi davraning ilk turida "Vilyarreal" LaLiga autsayderi "Levante"ni qabul qildi va 2:1 hisobida g'alabaga erishdi. "Sariq suvosti kemasi" tomonidan kiritilgan gollarning biriga rossiyalik futbolchi Denis Cherishev mualliflik qildi.

Tur sensaciyasi "Las-Palmas" - "Valensiya" o'yinida sodir bo'ldi. "Ko'rshapalaklar" uchun uchrashuv yaxshi boshlandi. 5-daqiqada Santi Mina "Valensiya"ni hisobda oldinga olib chiqdi. Xonatan Veraning goli tufayli birinchi bo'lim 1:1 hisobida yakunlandi. Ushbu sensaciyaga Gabriel Paulista aybdor desak ham bo'laveradi, chunki u 52-daqiqada o'z jarima maydonchasida qoida buzdi va sariq kartochka olgan himoyachi bir necha soniyadan so'ng ikkinchi ogohlantirishni qabul qilib, maydonni tark etdi. "Las-Palmas" futbolchisi Kaleri esa penaltidan unumli foydalandi. Uchrashuv oxirida "Valensiya"ning yana bir futbolchisi Ruben Vezo ikkinchi sariq kartochka tufayli chetlatildi.

LaLiganing ikki o'rtamiyona jamoasi "Alaves" va "Leganes" 20-turda to'qnash kelishdi. Gollarga boy bo'lgan bahsda jamoalar murosa ko'chasini tanlashdi. Munir El Xaddadi, Alfonso Pedraza, Gabriel, Xoseba Zaldua o'z hisobiga bittadan gol yozdirib qo'yishdi.

"Real" - "Deportivo". Ushbu uchrashuv Zinedin Zidan shogirdlari uchun o'ziga kelib olish va o'z kuchiga ishonish uchun imkoniyat edi. Bahs "Qirollik klubi" uchun yoqimsiz boshlandi. 23-daqiqada Adrian Keylor Navas darvozasini ishg'ol qildi. Joriy mavsum himoyadan ko'ra hujumda unumliroq o'ynayotgan Nacho hisobni tenglashtirdi. Garet Beylning 42-daqiqada urgan goli bo'lim "Real"ning g'alabasi bilan yakunlanishini taminladi. Ikkinchi bo'limda "qaymoqranglilar" raqib darvozasini 5 marta aniq nishonga olishdi. 7:1 hisobida yakunlangan uchrashuvda Nacho, Garet Beyl va Krishtianu Ronaldu dubl qayd etdi. Ronaldu o'zining ikkinchi golini urayotgan paytda jiddiy jarohat oldi. Raqib futbolchisi uning boshiga butsasining tag qismi bilan zarba berdi. O'yin yakunlanganidan so'ng yuzi qon bilan belangan portugaliyalikning bazi harakatlari memlarga aylantirildi. Futbolchi tezroq sog'ayib ketishini tilab qolamiz.

"Real Sosedad" - "Selta" uchrashuvi turnir jadvalida yuqoriroq bo'lgan "keltlar"ning ("Selta" laqabi) g'alabasi bilan yakunlandi. Bahs mezbonlarning 10-daqiqadagi goli bilan boshlandi (Villian). 20-daqiqda Yago Aspas penaltidan hisobni tenglashtirdi. Bir necha daqiqadan so'ng "Selta" darvozasiga 11 metrlik jarima belgilandi, biroq Villian dubl qayd eta olmadi. Ikkinchi bo'limning o'rtalarida "Selta" hujumchisi Maksimiliano Gomesning goli mehmonlarning g'alabasini taminladi.

LaLiga turnir jadvalida katta farq bilan yetakchilik qilayotgan "Barselona" 20-turda "Benito Vilyamarin" stadionida "Betis" mehmoni bo'ldi. Birinchi bo'limda raqib darvozasiga bor-yo'g'i 2ta aniq zarba berib, gol ura olmagan ispan grandi bor kuchini ikkinchi bo'limda ishga soldi. Luis Suares va Lionel Messi dubl qayd etgan uchrashuvda Ivan Rakitich joriy mavsum LaLigadagi ilk golini kiritdi. Kataloniya klubi safida Tomas Vermalen jarohat olib, maydonni muddatidan avval tark etdi.

20-tur uchrashuvlarini "Eybar" - "Malaga" to'qnashuvi yakunlab berdi. Bahs 1:1 hisobida nihoyasiga etdi. "Eybar" safidan Kike, "Malaga"dan esa Yusuf An-Nasri gol urishga muvaffaq bo'lishdi. O'yin oxirida Zdravko Kuzmanovich 1 daqiqa ichida ikkita sariq kartochka ishlab, maydonni qolganlardan bir necha soniya avval tark etdi.

20-turdagi 10ta uchrashuvga 283323 nafar muxlis stadionga tashrif buyurdi. Eng ko'p tomoshabin yiqqan o'yin "Real" - "Deportivo" uchrashuvi bo'ldi. "Santyago Bernabeu"dagi bahsni 63504 nafar muxlis stadiondan tomosha qilishdi. Eng kam tomoshabin esa "Eybar" - "Malaga" o'yinida kuzatildi (4520).

LaLiganing 20-turida 9ta penalti tepildi. Bu so'nggi 15 yillikdagi eng yirik ko'rsatkich. Oxirgi marta 2002-2003 mavsumning 37-turida 9ta 11 metrlik jarima belgilangan edi.