Жэксон Ирвайн: "Ўзбекистоннинг ҳозирги таркиби биз Осиё кубоги-2019да тўқнаш келган таркибдан кучлироқ"

- Салом Жэксон. Жамоанг кейинги босқичга йўл олгани билан табриклайман. Австралиянинг мусобақадаги мақсадлари қандай?

- Бизнинг асосий миссиямиз иложи борича узоқроқда бориш. Бир неча йил аввал ушбу мусобақада чемпион бўлган эдик. Яна бир бор ўша ишни такрорлашни мақсад қилганмиз. Эндигина иккинчи учрашувни ўтказдик. Буёғига рақиблар қийинлашиб бораверади.

- Австралия терма жамоасидан ташқари яна қайси терма жамоалар ушбу мусобақада ғолиб бўлиш учун даъвогар сенинг фикрингча?

- Осиёда минтақасида Жанубий Корея, Япония, Эрон, Саудия Арабистони каби катта жамоалар бор. Ушбу мусобақада ғолиб бўлиш учун уларни мағлуб этишимиз керак.

- Гуруҳ босқичидаги сўнги учрашув Ўзбекистон терма жамоасига қарши кечади. Кейинги рақиб ҳақида нималар дея оласан?

- Ўзбекистон терма жамоаси билан 2019 йилги Осиё кубогида ҳам тўқнаш келган эдик. Жуда қийин учрашув бўлганди, 120 дақиқа ва пенальтилар серияси. Ҳозирги кунда Ўзбекистон терма жамоасининг таркиби янада кучайган. Жамоангизда техник ва жисмоний тарафлама кучли авлод етишиб чиқди. Ўзбекистонга қарши учрашув Сурия ва Ҳиндистонга қарши кечган учрашувлардан анча қийинроқ бўлиши аниқ.

Абдулвосит Бектемиров суҳбатлашди