Ҳавога учирилган пуллар

Спортнинг ушбу турида анчагина пул айланади. Масалан, ўтган ҳафта бўлиб ўтган "Интер" - "Ювентус" ўйини 3,7 миллион евро тўплади.

Биз эса бугун яхшигина сумма эвазига сотиб олиниб, ўзини кўрсата олмаган футболчилар ҳақида гаплашамиз.

Марио Балотелли

Трансфер: Милан -> Ливерпуль

Трансфер суммаси: 20 млн. евро

Статистика: 28 ўйин; 4 гол.


"Милан" сафидаги муввафақиятли мавсумдан сўнг Балотелли 2014 йил 25 август куни яна Англияга қайтади. Футболчи Суарес кетганидан сўнг кучли ҳужумчига муҳтож бўлиб қолган "Ливерпуль" сафига бориб қўшилганди.
Ўша йилнинг 17 сентябрида футболчи клуби сафидаги илк голини "Лудогорец" дарвозасига киритганди. 2015 йилнинг 10 февралида эса АПЛ доирасидаги биринчи ва охирги голини киритган. Очиғини айтадиган бўлсак, "Ливерпуль" селекция ҳизмати ушбу трансферни амалга ошириб "еб қўйди". 20 миллионга ҳарид қилинган футболчи "Ливерпул"даги фаолияти давомида бор йўғи 4 тагина гол кирита олди. Шундан сўнг у яна "Милан"га қайтиб кетди.

Майкл Оуэн

Трансфер: Ливерпуль -> Реал Мадрид

Трансфер суммаси: 11 млн. евро

Статистика: 55 ўйин; 19 гол.


Ушбу трансферни катта муваффақиятсизлик деб бўлмайди. Бироқ, инглиз ҳужумчиси мадридликлар сафида ўзидан кутилган ўйинни намойиш эта олмади. Унга ушбу фаолияти давомида доимий жароҳатлар ҳалал берарди. Бу орада у захира ўйинчисига айланиб қолди. Сўнгра... 2005 йилда жамоага Робиньо ва Баптиста каби футболчилар келганидан сўнг унинг ўзи жамоадан кетмоқчи эканлигини маълум қилди. У ўзининг жонажон "Ливерпул"ига қайтишни истаганди. Бироқ, ўша пайтда унинг трансфери учун мерсисайдликларда пул йўқ эди. Шу сабаб, футболчи 25 миллион евро эвазига "Ньюкасл" сафига бориб қўшилади. Ушбу трансфер орқали "Реал" пул ишлаб ҳам олган. Бироқ, футболчининг ўша пайтдаги потенциалини ҳисобга оладиган бўлсак, уни бежизга ушбу рўйхатга киритмаганимизни сезиб олишингиз мумкин.

Асьер Ильярраменди

Трансфер: Реал Сосьедад -> Реал Мадрид

Трансфер суммаси: 38.9 млн. евро

Статистика: 61 ўйин; 2 гол.


2013 йилнинг 12 июлида "Реал" билан 6 йиллик шартнома имзоланади. Унинг трансфери мадридликлар учун 38,9 миллион еврога тушган. 30 миллион унинг шартномасидаги нархи. Яна деярли 9 миллионга яқин пул қўшимча қийматлар солиғи. Ушбу пулни ҳам "Реал" тўлаган.

Аммо, лекин, бироқ... Не-не умидлар билан ҳарид қилинган ушбу футболчи ҳам янги жамоаси таркибида ўзини кўрсата олмади. Асьер жамоа сафида жароҳат олган Хедира ва Модричларнинг ўрнига майдонга тушарди. Қолган пайт эса асосан захирада қолган.

2015 йилнинг январида футболчига "Атлетик" томонидан қизиқиш билдирилаётганлиги ҳақида хабарлар тарқалганди. Лекин, ниманидир ўзгаришига умид қилган футболчи мадридликлар сафида қолишга қарор қилганди. Ковачичнинг жамоага келиши билан барчаси ўз якунига етди. Асьер 15 миллион евро эвазига собиқ жамоаси - "Реал Сосьедад" сафига қайтиб кетди. Шу тариқа мадридликлар ушбу трансфер орқали 24 миллион евро йўқотганлар.

Энди Кэролл

Трансфер: Ньюкасл -> Ливерпуль

Трансфер суммаси: 41 млн. евро

Статистика: 55 ўйин; 12 гол.



Ушбу трансфер ҳам "Ливерпул"га жуда қимматга тушган. Вақтида клуб Кэролл учун 41 миллион евро тўлаган. Англия терма жамоасининг ўша пайтдаги ҳужумчиси "қизиллар" сафида 55 та ўйинда бор-йўғи 12 та гол кирита олган.

Муваффақиятсиз ўйинлардан сўнг футболчи 17 миллион евро эвазига "Вест Хэм"га сотиб юборилган. Олди-қочди гапларга қараганда, "Ливерпуль" ўз футболчисига жамоани тарк этишни илтимос қилиб пул тўлаган илк клуб ҳисобланади. Ўшанда унинг ўзига жамоадан кетиши учун 1 миллион евро тўлаб берилган экан.

Робиньо

Трансфер: Реал Мадрид -> Манчестер Сити

Трансфер суммаси: 40 млн. евро

Статистика: 53 ўйин; 16 гол.


2008 йил футболчи "Челси" сафига бориб қўшилиши кутилганди. Бироқ, трансфер ойнасининг сўнгги кунида уни "Манчестер Сити" илиб кетади ва футболчи билан 4 йиллик шартнома имзоланади. Норасмий маълумотларга қараганда, "шаҳарликлар" футболчи учун 40 миллион евро тўлаб беришган. Ўша пайтда бу Британия футболи учун рекорд эди (албатта, 2011 йил "Челси" Торресни сотиб олмагунича).

40 миллион евро эвазига 53 та ўйинда 16 тагина гол? Бу ҳам бразилиялик ҳужумчига ярашмайдиган статистика. Икки омадсиз мавсумдан сўнг футболчи 20 миллион евро эвазига "Милан"га сотиб юборилган.

Андрей Шевченко

Трансфер: Милан -> Челси

Трансфер суммаси: 41 млн. евро

Статистика: 48 ўйин; 9 гол.

"Шевченко — дунёнинг энг кучли ҳужумчиси. Чунки, у муҳим ўйинларда ўзининг нималарга қодир эканлигини исботлаган". Бу Дрогбанинг сўзлари эди. Бироқ, айнан африкалик футболчи "аристократлар" афсонасига айлана олди. Шевченко эса "Челси" тарихидаги энг омадсиз трансферлар қаторига кириб қолган. Икки йил ичида оғир жароҳатлар, операциялар украиналик футболчига ўзини кўрсатиши учун имкон бергани йўқ. Моуриньонинг ишончига қарамасдан, у 48 та ўйинда бор-йўғи 9 маротаба рақиблар дарвозасига гол кирита олган. Шууунча пул бекорга кетди - футболчи эркин агент сифатида "Динамо" Киев сафига йўл олган.




Радамэль Фалькао

Трансфер: Атлетико -> Монако/МЮ/Челси

Трансфер суммаси: 60 млн. евро

Статистика: 60 ўйин; 18 гол.

2013 йилнинг 31 майида Фалькао Монакога кўчиб ўтди. Жамоа билан 5 йиллик шартнома имзоланди. Футболчининг трансфери учун 60 миллион евро тўланди. Аввалига барчаси яхши кетаётганди. Лекин, тиззадан олинган жароҳат футболчи учун мавсум якунланганини билдирарди. Ушбу жароҳат сабабли у шунингдек Бразилиядаги ЖЧни ҳам ўтказиб юборишга мажбур бўлганди.

Футболчи майдонга қайтганидан сўнг МЮ сафига бориб қўшилди. Манчестерликлар футболчининг ижараси учун яхшигина пул ва Фалькаонинг ўзига ҳафтасига 300 минг евро тўлардилар. Натижа - 29 та ўйин ва 4 та гол. Айни пайтда у "Челси" сафида ижара асосида ҳаракат қилмоқда. Натижа ҳам Фалькао усулида - 7 та ўйин 1 та гол. Жудаям омадсиз трансферЛАР!

Фернандо Торрес

Трансфер: Ливерпуль -> Челси

Трансфер суммаси: 62 млн. евро

Статистика: 172 ўйин; 45 гол



2011 йилнинг 31 январида "Челси" яхшигина сумма эвазиган Фернандо Торресини ўз сафига қўшиб олди. 5,5 йиллик шартнома ва ҳафтасига 175 минг фунт маош. 50 миллион фунтлик трансфер эса боя айтиб ўтганимиздек Англия Премьер-Лигаси тарихидаги рекорд трансферга айланди. Тўғри, 172 та ўйинда 45 та гол киритиш ҳамманинг ҳам қўлидан келавермайди. Бироқ, Торресдан бундан ортиғи кутилганди. Шундай вақтлар бўлганки, у 5 ой давомида гол кирита олмаган. Лондонликлар сафидаги илк голини киритиш учун унга 14 та ўйин керак бўлди. Шу жойига футболчининг "Ливерпуль" ва "Челси"даги статистикаларини келтириб ўтамиз. Ҳулоса эса ўзингиздан:

"Ливерпуль" - 142 ўйин ва 82 гол

"Челси" - 172 ўйин ва 45 гол

Кака

Трансфер: Милан -> Реал Мадрид

Трансфер суммаси: 65 млн. евро

Статистика: 120 ўйин; 29 гол


2009 йилнинг 8 июнида "Милан" ва "Реал" Каканинг трансфери борасида келишувга эришадилар. Футболчининг ўзи билан 6 йиллик шартнома имзоланди. Миланликларнинг идеалига айланган футболчи Мадридда порлай олмади. Доимий жароҳатлар футболчига ўзини кўрсатишга имкон бергани йўқ. 65 миллион евро эвазига сотиб олинган футболчи муваффақиятсиз мавсумлардан сўнг "Милан"га текинга қайтиб кетган.