"Динамо" олий лигага қайтди!

Бевосита учрашув ҳақида гапирадиган бўлсак, баҳсни ҳужумкор бошлаган вакилларимиз ўйиннинг дастлабки дақиқалариданоқ голли вазиятлар яратишди. 15-дақиқага келиб эса жамоа ва чемпионат тўпурарларидан бири Амиржон Сафаров ҳисобни очишга эришди, 1:0.

Голдан руҳланган мезбонлар ҳужумкорликни тўхтатишмади ва орадан 8 дақиқа ўтиб, қанотдан ёшлар терма жамоаси аъзоси Саиджамол Давлатжонов томонидан етказиб берилган тўпни Виктор Клишин бош билан рақиб дарвозасига киритди, 2:0.

Ўйиннинг 32-дақиқасида эса рақибнинг кам сонли ҳужумларидан бири ҳимоячи Акмал Бозоровнинг кутилмаганда ўз дарвозасини ишғол этиб қўйишига сабаб бўлди, 2:1.

Иккинчи бўлимда «Динамо» бош мураббийи Илҳом Шарипов бир қатор ўзгаришларга қўл урди ва бу ўзини оқлади. 68-дақиқада Алишер Холиқов бурчакдан Омаджон Тайлоқов томонидан етказиб берилган тўпни бош билан «Ёзёвон-Лочинлари» дарвозасига киритиб ҳисобни 3:1га етказди.

83-дақиқада эса айнан Алишер Холиқовнинг тўп оширишидан сўнг Миркомил Локаев тезкорлиги эвазига таблодаги ҳисобни 4:1 га етказиб, самарқандлик мухлисларнинг байрамни бошлашларига амалда «рухсат» берди.

Зеро, айнан ушбу ғалабадан кейин «Динамо» жамоасининг турнир жадвалидаги очколари сони 78 тага етди ва Самарқанд клуби энг яқин таъқибчиси бўлмиш «Норин» жамоасини 6 очкога ортда қолдирмоқда. «Динамо»нинг сўнгги турда «Цементчи», қолдирилган ўйинларда эса «Косонсой» ва «Хотира-79» жамоаларига қарши қандай ҳисоб қайд этишидан қатъий назар жамоамиз расман Олий Лига йўлланмасига эга чиқди. Чунки яқин таъқибчи «Норин» ҳисобида иккита ўйин бор ва рақиб бу баҳсларда ғалаба қозонган тақдирда ҳам ўзаро ўйинлар бўйича устунлик айнан «Динамо»да саналади.

Шундай экан, олдинда учта ўйин бўлишига қарамай, «Динамо» жамоаси ва унинг барча мухлисларини Самарқанд клубининг бир йиллик танаффусдан сўнг яна Олий Лигага қайтгани билан табриклаймиз!

5 ноябрь куни «Динамо» Самарқандда «Цементчи» клубини қабул қилади ва айнан ушбу баҳсдан кейин Самарқандда чемпионатнинг ёпилиш маросими ўтказилади.

Биринчи Лига. 35-тур

2 ноябрь (чоршанба)

«ДИНАМО» - «ЁЗЁВОН-ЛОЧИНЛАРИ» - 4:1

Самарқанд, 2000 томошабин.

Бош ҳакам: Исҳоқ Ибрагимов (Нукус)

Голлар: Амиржон Сафаров 15, Виктор Клишин 23, Алишер Холиқов 68, Миркомил Локаев 83 – Акмал Бозоров (авт, 32).

«Динамо»: Михаил Наумов, Акмал Бозоров, Алексей Николаев, Миркомил Локаев, Фирдавс Абдусалимов (Убайдулло Набиев, 58), Искандар Холмирзаев (Жасур Азимов, 46), Омаджон Тайлоқов (Комил Шарофутдинов, 78), Саиджамол Давлатжонов (Жонибек Кўчимов, 56), Достон Ибрагимов, Виктор Клишин (Алишер Холиқов, 64), Амиржон Сафаров.

«Ёзёвон-Лочинлари»: А.Фахриддинов, Ё.Ёралиев, У.Ҳошимов, З.Исмоилов, Б.Абдуманнонов, Ш. Абдураҳмонов, Б.Мадраҳимов, Д. Холматов, Б. Расулов, Ж.Саидов, А.Файзуллаев.

Назоратчи: А.Клепиков (Тошкент).


Турнир жадвали

№	Жамоа	Ўйин	Ғалаба	Дуранг	Мағлубият	Т-Н	Очко
1	Динамо	29	25	3	1	82-17	78
2	Норин	30	23	3	4	60-26	72
3	Цементчи	28	20	4	4	54-17	64
4	Уз-Донг-Жу	29	17	3	9	62-50	54
5	НБУ-Осиё	28	13	6	9	53-37	45
6	Насаф-2	29	14	0	15	54-56	42
7	Хоразм	28	11	5	12	49-40	38
8	Нурафшон	28	12	2	14	48-51	38
9	Машъал-2	29	10	7	12	41-53	37
10	Ёзёвон-Лочинлари	29	10	3	16	52-71	33
11	Орол	27	10	1	16	63-74	31
12	Локомотив-БФК	30	9	4	17	52-64	31
13	Зомин	28	9	4	15	39-51	31
14	Хотира-79	28	9	3	16	46-66	30
15	Пахтакор-2	27	7	6	14	51-49	27
16	Ғиждувон	27	6	5	16	36-88	23
17	Косонсой	28	6	3	19	34-59	21