"Динамо" жамоаси "Пахтакор-79"ни хотирлади
11 авг 2016 12:35
Янгиликлар

"Динамо" жамоаси "Пахтакор-79"ни хотирлади

Бундан 37 йил муқаддам – 1979 йилнинг 11 август куни ўзбек футболи оғир жудоликка юз тутган.

Авиаҳалокат туфайли «Пахтакор» жамоаси 17 нафар ўғлонини йўқотган. Улар орасидаги энг ёш футболчи самарқандлик Сирожиддин Бозоров эди.

Хотира – муқаддас. Бугун, 11 август куни «Пахтакор»-79 жамоаси хотирланади. Ўз вақтида ўзбек футболи намояндаси бўлган ушбу жамоа том маънода халқ жамоаси эди. Шу боис самода сочилган футболчиларимиз доимо эсланади, бу жамоа мухлислар қалбидан бир умрга жой олган.

«Динамо» футбол клуби куни кеча Тошкентдаги Боткина қабристонида жойлашган «Пахтакор-79» мемориал ёдгорлик мажмуасида бўлиб, барчамиз учун қадрли бўлган жамоани ёдга олишди. Марҳумларни хотирлаб, улар учун атаб ўрнатилган ёдгорлик пойига гуллар қўйишди. Ушбу жамоа доимо қалбимизда, юрагимизда!