Даврон Файзиев: "Мағлубиятга лойиқ эмасдик"

- Барчани Мустақиллик байрамимиз билан табриклайман. Юртимиз доимо тинч, осмонимиз мусаффо бўлсин. Бугун жамоамиз ўйин бошланиши билан бекорга келмаганини исботлади. Вазифамиз "Бунёдкор"га қарши жанговор ўйин кўрсатиш эди. "Бунёдкор" жамоаси билан ўйнаш мумкинлигини шогирдларимга таъкидлаб ўтгандим. Фақатгина тўғри ҳаракат, юқори хушёрликни сақлаган ҳолда тартибли ўйин кўрсатиш лозим эди. Ҳимояда жуда эътиборли бўлишни кўрсатмалар давомида алоҳида таъкидлаб ўтгандим. Бугун ёмон ҳаракат қилмадик, фақатгина футболдаги машҳур: "сен урмасанг, сенга гол уришади" нақли амалда яна бир бор ўз тасдиғини топди.

Биринчи даврада бўлгани каби бугун биз мағлубиятга лойиқ эмасдик.

Бугун ҳам жамоамизда гол уриш учун имкониятлар бўлганди. Лекин ҳужумни самарали якунлайдиган, фойдали иш коэффициенти юқори бўлган форвардларни топиш қийин. Бизга ҳам шундай футболчи, хусусан ҳужумчи етишмаяпти. Бу нарса бизга бугун яна бир бор панд берди. Ўйин менда яхши таассурот қолдирди. Лекин юзага келган вазиятлардан унумли фойдалана олмаслик давом этмоқда.

Ҳужумчи муаммоси фақат бизда эмас, барча жамоаларда бор. Бугунги ғалаба билан "Бунёдкор" жамоаси муборакбод этаман.
Ўйин учун эса йигитларимизда раҳмат айтдим.
Бугунги баҳс барчага ёқди, яхши таассурот қолдирди, деб ўйлайман.