Бугун “Халқлар Дўстлиги” Кубоги старт олади

Бугун старт оладиган мусобақада 16та жамоа қатнашади. Қорақалпоғистон Республикаси ва вилоятларда фаолият кўрсатадиган Меҳрибонлик уйлари тарбияланувчиларидан ташкил топган жамоалар иштирок этади. Республика Халқ таълим вазирлиги, “Сен ёлғиз эмассан” болалар жамоат фонди, Ўзбекистон футбол федерацияси, “Оқ-тепа” ва "Локомотив" футбол клуби билан ҳамкорликда ўтказилаётган мазкур турнирда 13-18 ёшли болалар қатнашади. Тўрт кун давом этадиган мусобақанинг барча ўйинлари “Оқ-тепа” майдонида бўлиб ўтади. Иштирокчилар 4 гуруҳга 4тадан ажратилган. Бугун очилиш маросими ва 15:00дан бошлаб гуруҳ учрашувлари старт олса, эрта-индин гуруҳ босқичининг қолган ўйинлари ўтказилади. Индинга тушдан сўнг чорак финал, 8 ноябрь куни эса, ярим финал ҳамда финал ўйинлари ташкил қилинади. Ўйинларнинг ҳар бир бўлими 20 дақиқадан иборат бўлади.
 
Иштирокчилар: Тошкент шаҳри (3та), Тошкент вилояти (2та), Қорақалпоғистон Республикаси, Навоий вилояти, Хоразм вилояти, Сурхондарё вилояти, Қашқадарё вилояти, Сирдарё вилояти, Жиззах вилояти, Андижон ва Наманган бирлашган жамоаси, Фарғона вилояти, Самарқанд вилояти, Бухоро вилояти.
 
Сайтимиз мазкур турнирни ҳар куни ёритиб боришни режалаштирган. Қизиқувчилар, бугун тушдан бошлаб, кейинги уч кун давомида эрталаб 09:00дан кечгача ўзининг бўш вақтига қараб, “Оқ-тепа” майдонига ташриф буюришлари ва турнирни кузатишлари мумкин.