Бугун футбол. "Навбаҳор" - "Локомотив"

Айтиш мумкинки, турнинг марказий учрашуви бугун Наманганда "Навбаҳор" ва "Локомотив" жамоалари ўртасида кечади. Бу ўйин "Навбаҳор" учун жорий мавсумдаги илк уй учрашуви бўлади, шу боис ўйинга қизиқиш жуда катта. Соат 20:00да бошладиган баҳсда стадион тўлиши кутилмоқда.

Бизга маълум бўлишича, учрашув учун чиқарилган чипталар аллақачон сотиб бўлинган. "Навбаҳор" аввалги иккита турни сафарда ўтказди ва "Металлург" билан дуранг ўйнаган бўлса, АГМКни Олмалиқда 2:1 ҳисобида мағлуб этди. Шу ўйинда Азиз Турғунбоев жуда чиройли ўйин намойиш этиб берганини мухлислар яхши билишади.

"Локомотив" бугун Ўзбекистоннинг амалдаги чемпиони сифатида майдонга тушади. "Темирйўлчилар" бунгача сафарда "Қизилқум"ни 3:0 ҳисобида мағлуб этиб, уйда "Металлург" билан 1:1 қайд этишди. Бундан ташқари, "Локо" ОЧЛда Қатарнинг "Ал Дуҳайл" клубига ютқазиб қўйди.

"Локо"нинг 1-тур учрашувида Икром Алибоев жуда чиройли гол муаллифи бўлганди. "Навбаҳор" сафида эса Азиз Турғунбоев АГМК дарвозасини жарима тўпидан ажойиб тарзда ишғол қилди. Бугун ҳар иккала футболчи яна ўз имкониятларини кўрсатса ажаб эмас.

Тўғри, "Локомотив"нинг ОЧЛдаги ишлари яхши кетмаяпти, лекин Суперлигада бу жамоадан ҳамма ҳайиқиши бор гап. Аммо "Навбаҳор" бугун 20 мингдан зиёд мухлис кўз ўнгида "Локо"га жиддий қаршилик кўрсатиши кутилмоқда. Нима бўлган тақдирда ҳам, биз иккала жамоадан ҳужумкор ва очиқ футбол кутиб қоламиз.