Баҳодир Аҳмедов: "Испаниялик мураббийларнинг терма жамоамизда иш бошлаши фойдали бўлади"

Ҳар тўрт йилликнинг нуфузли мусобақасига муносиб тайёргарлик кўриш мақсадида футзал терма жамоамиз 25-30 июль кунлари Таиландда ташкил этиладиган халқаро футзал турнирида иштирок этади.

Баҳодир Аҳмедов шогирдлари мусобақанинг гуруҳ босқичида Таиланд, Косова ва Мозамбик вакиллари билан беллашади.

Айни пайтда Тошкентда ўқув-машғулот йиғинини олиб бораётган терма жамоамиз, 19 июль куни Бангкок шаҳрига йўл олади. Биз эса бу борада терма жамоамиз бош мураббийи Баҳодир Аҳмедовнинг фикрлари билан қизиқдик.

"Тайёргарлик жараёни жуда яхши кетмоқда. Ўзбекистон футбол ассоциацияси томонидан барча шароитлар яратилган. Ҳозирда мураббийлар штабида, аввалги Жаҳон чемпионатида кўмаклашган икки нафар испаниялик мураббий иш бошлади. Бири дарвозабонлар билан, иккинчиси эса жисмоний тайёргарлик бўйича. Йигитлар га бунинг катта фойдаси бор, деб ўйлайман.

Жаҳон чемпионатидан олдин Таиландда халқаро турнирда иштирок этамиз. Мусобақага тайёргарлик кўряпмиз. Қанча кучли жамоалар билан ўйнасак ўзимизга яхши. Заиф томонларимизни кўриб олиш имкони бўлади. Хато ва камчиликлар устида ишлаймиз",- дейди Баҳодир Аҳмедов.