Англия Премьер-лигаси бошланишига 16 кун қолди!

Серхио Агуэро - 16

Тўлиқ исм шарифи: Серхио Леонель Агуэро дель Кастильо

Туғилган сана ва шаҳар: 1988 йил 2 июнь, Кильмес (Аргентина)

Серхио Агуэро профессионал фаолиятини 2003 йилда Аргентинанинг "Индепендьенте" сафида бошлаган. Ўшанда Агуэро бор йўғи 15 ёш 35 кунлик эди ва у мамлакат чемпионати тарихидаги энг ёш футболчига айланди.У 3 йил давомида клубнинг 54 учрашувида майдонга тушиб, 23та гол уришга муваффақ бўлган.

2006 йилда Мадриднинг "Атлетико" клуби 23 млн. евро эвазига Агуэрони харид қилади. Аргентиналик "Атлетико"даги 5 йиллик фаолияти давомида 175та ўйинда майдонга тушади ва 74 маротаба ўз исмини таблога ёздириб қўйган. 2010 йилда Агуэро Мадрид клуби билан УЕФА Европа лигаси ва УЕФА Суперкубогида зафар қучади.

2011 йил 28 июлда Серхио "Манчестер Сити" билан шартнома тузганини маълум қилади. "Атлетико" Агуэро учун "шаҳарликлар"дан 38 млн. фунт ишлаб олган. 2012 йилнинг 13 майида КПРга қарши баҳснинг 93 дақиқасида Агуэро урган гол "Манчестер Сити"га Премьер-лига чемпионлигини тақдим этади. Футболчи ҳозиргача "Сити" сафида 120та учрашувда майдонга тушишга улгуриб, рақиб дарвозаларини 78 маротаба аниқ нишонга олган.

Терма жамоа

Серхио Агуэро Аргентина терма жамоасининг деярли барча ёш тоифаларда ўйнаган. 2008 йилда Серхио Агуэро, Лионель Месси, Карлос Тевес, Анхель Ди Мария, Хавьер Маскерано каби футболчиларга эга бўлган Аргентина олимпия терма жамоаси Пекин Олимпиадасида олтин медалларни қўлга киритган.

 Агуэро ва Аргентина терма жамоаси 2 йил кетма-кет йирик турнирлар финалида мағлуб бўлади (ЖЧ-2014, Америка Кубоги-2015). Серхио Агуэро ҳозиргача терма жамоа сафида 66та учрашувда 29та гол уришга муваффақ бўлган.