“Андижон” йиғинни Чирчиқда ўтказади

“Бургутлар” 9 июль кунидан давралар оралиғидаги ўқув-йиғин машғулотига киришади. Йиғин ўтказиш учун Чирчиқ шаҳридаги сўлим гўшалардан бири танланган. Мураббийлар штабининг режасига кўра, Чирчиқда икки маҳал машғулот ўтказиш билан бирга, айрим жамоалар билан синов-назорат учрашувини ҳам ташкил этиш режалаштирилган. Ҳозирча спарринг-рақибларнинг иккитаси маълум бўлиб, дастлаб Тошкент вилоятининг “Нурафшон” жамоаси, кейинчалик қўшни Тожикистон республикасининг “Хўжанд” клуби билан куч синашади. Маълумки, “Нурафшон” жамоаси ПРО-Лиганинг “Б” гуруҳида карвонбошчилик қилиб келаётган бўлса, “Хўжанд” ОФК Кубоги иштирокчиси ҳисобланади.

Албатта бу йил ўз олдига Суперлигага чиқиш вазифасини қўйган ва бу йўлда астойдил курашаётган “Андижон” таркибида трансфер чоғида айрим ўзгаришлар бўлиши кутилмоқда. Ҳар бир позициядаги рақобатни кучайтириш мақсадида ҳозирда бир қатор футболчилар билан музокара олиб борилмоқда. Номларни ҳозирча ошкор эта олмасакда, уларнинг деярли барчаси Суперлига клубларидан келаётганини айтиш мумкин. Агарда ушбу футболчилар билан расмий келишувга эришилса, шундагина номлар эълон қилинади.

Мавсумнинг биринчи қисмини “Андижон”да ўтказган, Хусан Олимжонов, Миржалол Ражабов, Ҳошимбек Шокиров, Маъруф Зокиржонов, Бекзод Ғанижонов ҳамда Обид Ҳакимов сингари футболчилар билан тузилган шартнома ҳар икки томоннинг ўзаро келишувига биноан бекор қилинди ва улар билан дўстона равишда хайрлашилди. Ўз навбатида маълум муддат “бургутлар” шарафини ҳимоя қилган юқоридаги футболчиларнинг кейинги фаолиятига омад тилаймиз.

Яна шуни ҳам қўшимча қилиш лозимки, “Андижон” тажрибали ярим ҳимоячи Элдор Бойматовни трансферга қўйди. Айни дамда марказий ярим ҳимоячи Суперлига вакили “Қизилқум” йиғинида иштирок этмоқда. Агарда томонлар футболчининг трансфер масаласида бир тўхтамга келса, у холда футболчи мавсумнинг қолган қисмини “Қизилқум”да ўтказади. Акс холда, Бойматов бошқа клубга трансфер қилиниши мумкин. Айни дамда Элдорга бир нечта жамоалардан қизиқиш бор.