Шота Арвеладзе: "Ҳеч қачон футболчиларимга кўп гол урманглар демайман. Бу мухлисларга ва рақибга нисбатан ҳурматсизлик бўлади"

- Дерби учун ноодатий ҳисоб бўлди. Бугунги ўйин "Бавария" - "Барселона" баҳсига ўхшаб кетди. Йигитлар учун хурсандман. Қийин даврдан ўтиб олдик. Яхши ўйнадик ва баҳсни назорат қилдик. Бешта алмаштириш амалга оширганда ўйин суръатини бирдек сақлаш қийин, лекин биз буни уддаладик. "Насаф" билан ҳам, бугун ҳам шундай бўлди. Захирадан тушган футболчилар ўзларини кўрсатишди. Уларнинг шундай яхши ишлаётганидан бахтиёрман. Бу баҳс дерби тарихидан ўрин олади деб ўйлайман. "Локомотив"га бундай қийин ҳолатдан тезроқ чиқиб олишларини тилайман, - дейди Шота Арвеладзе. 

- Сентябрь ойида Ўзбекистон терма жамоаси йиғин ўтказади. 3 сентябрь куни Тожикистон билан ўртоқлик ўйини бор. "Пахтакор" эса 1 ва 5 сентябрь кунлари ўйин ўтказади. Кейин Қатарга учиб кетади. Терма жамоага футболчиларни қўйиб юборасизми?
- Аввало терма жамоага футболчини қўйиб юбормасликка ҳаққим йўқ. Бундан ташқари футболчилар ҳам терма жамоада ўйнашни исташади. Умид қиламанки, бизнинг чемпионат ўйинлари ҳамда Чемпионлар Лигаси олдидан маъқул ҳолат топилади.

- Томас Мюллер интервью бериб бош мураббий танаффус вақтида футболчиларга 6тадан кўп гол урманглар деганини айтди. Сиз ҳам футболчиларга шундай дедингизми?
- Бундай интервьюни кўрмадим. Натижа қандай бўлишидан қатъи назар мухлислар учун ўйнашда давом этамиз. Рақиб, мухлислар ҳамда ўз жамоангни ҳурмат қилиш лозим. Футболчилар ўз имкониятларини охиригача намойиш этишлари лозим.

- Сентябрь ойида жуда тиғиз тақвим ва ОЧЛ баҳслари кутмоқда...
- Тўғри жуда ҳам оғир тақвим бизни кутмоқда. Биз 5 ҳафтани йўқотдик ва бу даврда даволандик. Рақибларимиз эса чемпионатда ўйинлар ўтказишди. Лекин бизда ОЧЛда 6 очко бор. Биринчи навбатда гуруҳдан чиқишимиз шарт. Кейин насиб бўлса навбатдаги баҳслар ҳақида бош қотирамиз.