Зейтуллаев: "Медаллар учун имконият? "Насаф", "Нефтчи", "Пахтакор", "Сўғдиёна" ва "Динамо" билан қандай курашиш мумкин?"

Ўйин ҳақида

— Ўзбекистоннинг энг яхши жамоасига қарши ўйин қизиқ кечди. Бундай дейишимга сабаб, ушбу клуб сўнгги йилларда мамлакатимизда етакчилик қилмоқда. Жамоам билан фахрланаман. "Бунёдкор" илк бўлимни жуда яхши ўтказди, иккинчи бўлимда эса чемпионлик учун курашаётган "Насаф" ўз сўзини айтди. Олдинда бизни қандай жамоага қарши ўйин кутиб турганини билардик, аммо йигитлар яхши ўйнашди, уларга раҳмат. Бугун стадионга ташриф буюрган мухлис иккала жамоанинг ҳам ўйинидан лаззат олди деб ўйлайман.

— Сиз "Насаф"ни энг зўр жамоа дейишингизга қарамай, улар билан учта ўйин деярли бир хил ҳисоб билан якунига етмоқда. Зейтуллаевнинг "Бунёдкор"ига "Насаф" қулай рақиб дейиш мумкинми? Сабаби жамоа уларга мағлуб бўлмаяпти.

— "Насаф" ким учун қулай рақиб бўлиши мумкин? Бундай ўйинчилар билан у қанчалик қулай рақиб? Ўйинчилар савияси, жуда тажрибали мураббий. Улар ҳам ўзлари футбол ўйнашади, балки рақибга ҳам футбол ўйнагани беришади. Менимча, бугун иккала жамоа ҳам яхши футбол намойиш этишди. Ҳа, улар ноқулай рақиб.

— Сўнгги ўйинларга қарасак, "Бунёдкор" кўпроқ тўп ўтказиб юборадиган бўлди. Бунга сабаб нима деб ўйлайсиз?

— Биз ОКМК билан фақатгина психологик блекаут сабаб кўп гол ўтказиб юбордик. Биз ҳимоя бўйича Ўзбекистон чемпионатининг 5 ёки 6-жамоасимиз. 

— ОКМКдан сўнг "Қўқон-1912"дан ҳам иккита тўп ўтказиб юборилди.

— Менимча, чарчоқ бошланаётгандек. Охирги 6-7 ўйинда жамоалар финал чизиғига чиқишади. Ўйинчилар чарчашни бошлашади. Бунга қадар Бобур Йўлдошевни узоқ муддатга йўқотдик. У бизга катта ёрдам берган бўларди. Одил Ҳамробековнинг ҳам кетганини олайлик. Бугун унинг ўрнини Амир, бунга қадар Расул эгаллади. Бу бироз таъсир ўтказмоқда. Умуман олганда, йигитлар тезда Одил ва Качоррини эсдан чиқариб юборишди. Бу ҳам бир сабаб деб ўйлайман.

— "Бунёдкор"нинг медаллар учун имкониятини қандай баҳолайсиз?

— Қандай медаллар? Бизнинг мавсум учун вазифамиз олдинги мавсумдаги натижани яхшилаш эди. Биз 10-ўринни эгалладик ва Ўзбекистон чемпионатидан тушиб кетишимизга бир баҳя қолганди. "Насаф", "Нефтчи", "Пахтакор", ўша "Сўғдиёна" ва "Динамо" билан қандай курашиш мумкин? Биз секинлик билан ўз йўлимиздан боряпмиз. 10-ўринни эгаллагандик, медаллар учун қандай курашиш мумкин?