Сиаваш Ҳақназарий: "Биринчи давра қандай ўтгани ҳақида гапиришни истамайман. Янги бош мураббий жамоавий руҳимизни ўзгартирди"

- Драматик кечган учрашувда "Навбаҳор" ярим финалга йўл олди. Бугунги учрашув ҳақида фикр билдириб ўтсангиз?

- Бугунги учрашувни томоша қилган мухлислар ўйиндан роҳатланишди. Икки жамоа ҳам ҳужумкор ва агрессив футбол намойиш этишди. Биз дастлабки дақиқаларданоқ рақиб дарвозасида хавфли вазиятлар ярата бошладик, аммо таблодаги ҳисобни ўзгартира олмадик. Бундай ўйинларда фақат битта жамоага кейинги босқичга йўл олади ва бу жамоа биз бўлдик. Қўшимча бўлимларда вазиятни ўнглай олдик ва кейинги босқичга йўл олдик. Бугунги учрашувдан сўнг бизда янада кўпроқ иштиёқ пайдо бўлди.

- Мавсум аввалида янги жамоага ўтдингиз, лекин биринчи давра сиз учун жуда омадсиз бўлди. Кўп жароҳатлар олдингиз ва деярли ўйин амалиётисиз қолиб кетдингиз. Бунга нима сабаб бўлди?

- Мен у давр ҳақида ўйлашни истамайман тўғриси, ҳозирги вақт ва келажагим ҳақида фикр юритишим тўғрироқ бўлади. Вақт барча тўғри ва нотўғри қарорларни кўрсатиб қўйди. Мен ушбу ҳолатдан ҳафа эдим, аммо менга тақдим этилган саноқли дақиқаларда имкон қадар яхшироқ ўйнашга ҳаракат қилдим. Бу мени характерим, мен шундай ўйнашга ўрганганман. Меҳнат қилишда давом этиш ҳар доим ўз мевасини беришига ишонаман. Ҳаётимизда содир бўлаётган воқеаларнинг барчаси яратган эгам томонидан йўлланган синовдир.

- "Навбаҳор" жамоасида бош мураббий ўзгарди. Янги бош мураббий жамоада қандайдир ўзгаришларга қўл урдими? Жамоада қандай ўзгаришлар рўй бердими?

- Ушбу қисқа вақт ичида рўй берган асосий ўзгаришлардан бири бу жамоадаги менталитет. Жамоанинг фикрлаши ва ўйин ҳақида тассавурлари ўзгарди. Ҳужумкор футбол ўйнашга интиламиз ва бу ўзимизга бўлган ишончни янада кучайтиради.

- "Навбаҳор" иккинчи даврада ўз олдига қандай мақсадлар қўйди?

- Мавсумдаги ўйиндан буён мақсадимиз - лигадаги энг яхши жамоа бўлиш. Кубок баҳсларида ҳам муваффақият қозонишни мақсад қилганмиз. Чемпионатда кўп очколар йўқотдиқ, лекин очколарни сўнгги учрашувдан сўнг ҳисоблаш тўғрироқ бўлади.

- Ўзбекистон миллий терма жамоаси ЖЧ-2026 учинчи саралаш босқичида Эрон билан бир гуруҳдан жой олди. Айни дамдаги Эрон терма жамоаси ҳақида фикрингиз қандай? Ушбу терма жамоалар ўртасида кечадиган икки тўқнашув ҳақида ҳам гапириб ўтсангиз?

- Менинг фикримча, Ўзбекистон ва Эрон терма жамоалари Осиё кубогида яхши натижага эриша олишмади. Ушбу жамоалар яхшироқ натижа қайд этишга қодир. ЖЧ-2026 саралашининг гуруҳ босқичида айнан шу икки терма жамоа гуруҳда етакчилик қилади деб ўйлайман. Қатар ҳам анча кучли жамоа. Натижа қандай бўлишини эса олдиндан башорат қилиш нотўғри.

Абдулвосит Бектемиров суҳбатлашди