Рустам Турдимуродов: "Дербини ютишимиз шарт эди. Мураббийлар менга имконият беришмоқда, мен эса уларнинг ишончини оқлашга максимал тарзда ҳаракат қиляпман"

- Ўйин ҳақидаги фикрларингиз.

- Ўйин биз кутганимиздан қийинроқ бўлди. Биринчи бўлиб ҳисобни очганимиз бизга ишонч берди. Чиройли ғалабага эришдик.

- "Андижон" мавсумни ажойиб тарзда бошлаганди, лекин кейинчалик кетма-кет 7 та учрашувда ғалаба қозона олмади. Ушбу нохуш серия айнан "Навбаҳор" қарши учрашувда якунланишига нима сабаб бўлди?

- Узоқ вақтдан буён ғалаба қозона олмаётган эдик. Дербини ютишимиз шарт эди. Мураббийлар танлаб услуб ва футболчиларнинг иштиёқи бугунги ғалабанинг асосий омиллари бўлди.

- "Андижон"да ҳужум чизиғидаги рақобат анча кучли, лекин шунга қарамай сиз сўнгги учрашувларда кўп гол урмоқдасиз. Александр Хомяков бир нечта учрашув аввал ҳужумчилар ҳозирча ишончни оқламаяпти деган эди. Бош мураббийнинг гаплари сизга таъсир қилдими?

- Мураббийлар штаби менга ишонч билдиришди ва имконият беришни. Мен тақдим этилган имкониятдан 100% фойдаланишга ҳаракат қиляпман. Бош мураббийимизнинг гапларини яхши маънода қабул қилдим. Рақобат ҳақида гапиришнинг ҳожати йўқ. Биз барчамиз бир жамоамиз. Бири акам, бири укам. Жамоада барчаси яхши.