Росеньор: "Челси"да олти йил, ҳатто ундан ҳам кўпроқ ишлашни истайман, лекин..."

Бироқ "нафақахўрлар"нинг янги устози Лиам Росеньор клуб унга узоқ муддат ишонч билдиришга умид қилмоқда.

"Челси" бош мураббийи жамоада Микель Артетанинг "Арсенал"даги муддатидан ҳам анча узоқроқ ишлашни исташини айтди, аммо бунинг учун ғалаба қозониш зарурлигини таъкидлади:

"Ҳа, мен бу ерда олти йил, ҳатто ундан ҳам кўпроқ ишлашни истайман. Лекин бунга эришиш учун ғалаба қозониш кераклигини тушунаман. Ҳаммаси жуда оддий. Ҳар бир клубнинг ўз лойиҳаси бор, футболда "лойиҳа" деган сўз тез-тез ишлатилади, аммо ҳар қандай лойиҳанинг моҳияти — ҳар бир ўйинда ғалаба қозонишга уриниш.

Жамоа бир, икки, уч йилдан кейин қандай кўринишда бўлиши кераклиги ҳақида тасаввурим бор. Шу билан бирга, ҳозирнинг ўзидаёқ ғалаба қозониш учун етарлича ресурс ва воситаларим бор ва мен буни ўйинчиларга очиқ айтдим", – деди Росеньор.

"Челси" эртага, 14 январь куни Англия Лига Кубоги ярим финалида "Арсенал" билан тўқнаш келади. Учрашув 01:00 га белгиланган.