Расман: "Навбаҳор"ни 3 нафар футболчи тарк этди

Клуб матбуот хизматининг хабар беришича, бу бош мураббий Андрей Антанасович Канчельскиснинг хоҳиши бўлган.

Ушбу ўйинчиларнинг барчаси ярим ҳимоя чизиғида тўп тепишади. Булар: Азиз Ибрагимов, Шаҳзод Шайманов ва Аюбхон Нўъмонов.

Ўтган мавсумда 34 ёшли тажрибали футболчи Азиз Ибрагимов 16та ўйинда майдонга тушиб, 524 дақиқа тўп тепиб, 2та гол урган бўлса, 27 ёшли Шаҳзод Шайманов 19та баҳсда майдонга тушиб, 1028 дақиқа ҳаракатланган ҳамда 2та гол муаллифига айланганди.

Наманганликлар таркибига ўтган мавсумнинг 2-даврасида қўшилган 28 ёшли Аюбхон Нўъмонов эса 3та ўйинда майдонга тушиб, 86 дақиқа тўп тепганди.

Мазкур ярим ҳимоячилар ва хабар берилганидек, кеча "лочинлар" сафини тарк этган тажрибали ҳимоячи Жаҳонгир Меҳмоновга жамоа устози Андрей Антанасович янги мавсумда эҳтиёжи йўқ эканлигини билдирди. Шу боис, ушбу футболчилар "Навбаҳор"ни тарк этишди.

Расмий хабар: Меҳмонов “Навбаҳор”ни тарк этди

"Навбаҳор" клуби мазкур ўйинчиларга жамоадаги фаолиятлари учун ўз миннатдорчилигини билдиради ҳамда уларнинг кейинги фаолиятларида омад ёр бўлишини тилайди", - дейилади клуб матбуот хизмати берган хабарда.