"Навбаҳор": Беларуслик ҳужумчи Андрей Лясюк кўрикдан ўтади

Икки кунлик хордиқдан сўнг жамоа Тошкентдаги "Геофизика" меҳмонхонасига йиғилади. "Лочинлар" "Локомотив"га қарши Олий лига 14-тур ўйини ўтгунга қадар у ерда истиқомат қилишади.

Таркибдаги ўзгаришларга тўхталадиган бўлсак, иккинчи даврадан бошлаб Тимур Яфаров, Дурбек Умаралиев ва Соҳиб Абдуллаев "Навбаҳор" шарафини ҳимоя қилмасликлари маълум бўлди. Шунингдек ярим ҳимоячи Акбаршо Рашидхонов ҳам "Андижон" сафида шуғулланмоқда.

Жамоага янги қўшиладиган ўйинчилар ҳозирча ноаниқ. Айрим манбаларда хабар қилинаётган маълумотлар умуман асоссиз эканлигини Бахтиёр Ашурматов ҳам тасдиқлади.

Хусусан, "Навбаҳор"га дарвозабонлар Тимур Жўраев, Мурод Зуҳуров, Маъмур Икромов ёки Андрей Мельничук борасида миш-мишлар хақиқатдан йироқ. "Локомотив" аъзоси Дилшод Жабборовни ҳам "Навбаҳор"га қайтиши футболчининг ўзига боғлиқ. "Темирйўлчилар" ярим ҳимоячисини Ашурматов қўл остида кўришга қарши эмас. Бироқ, футболчи "Олмалиқ" билан шартнома тузишга яқин тургани боис унинг тақдири ўз қўлида турибди.

Ҳужум чизиғида рақобатни кучайтириш мақсадида 6 июл куни Юрий Рижко билан бирга Белоруссиядан ҳужумчи Андрей Лясюк келиши кутилмоқда. Агарда ўйинчи мураббийлар кўригидан ўтса, у билан шартнома имзоланиши мумкин. Алишер Шоғуломов масаласига тўхталадиган бўлсак, "Оқ-тепа" вакили Тошкентнинг "Локомотив" клубига ўтишга яқин. Айрим манбаларда Шукурали Пўлатовнинг жамоадаги тақдири сўроқ остида эканлиги таъкидланган. Футболчилар Бахтиёр Аъзамович билан суҳбатлашгач бу каби масалаларга ойдинлик киритилишини таъкидлаш лозим.

Лекин, ҳозирча биронта ўйинчи ҳам кетиш истагини билдирмаган. Тўғри, вакилларимизга бошқа жамоалардан таклифлар келиб тушмоқда, аммо биронта ҳам ўйинчи "Навбаҳор" билан хайрлашиш истагини билдирмаган.