“Металлург”: биринчи давра сарҳисоби

Тошкент вилояти вакиллари ўтказилган 15 та учрашувнинг 8 тасида ғалаба қозонишди, 4 та ўйинда дуранг ўйнашди ва 3 та учрашувда имкониятни бой беришди. Рақиблар дарвозасига 24 та гол киритишгани ҳолда, ўз дарвозаларидан 17 та тўп олиб чиқишди.

Жамоа ўз уйида 8 та ўйин ўтказиб, шулардан 6 тасида зафар қучди. Ўз уйида ўтказилган учрашувларда олий лига жамоалари орасида “Металлург” энг яхши натижани қайд этди. Сафарда ҳам бекободликлар бу йил бир текис ўйин намойиш этишаётганлигини ҳам таъкидлаб ўтиш лозим. 7 та ўйинда 8 очко жамғарган маъданчилар бу борада чемпионатнинг 5-7 ўринларини “Пахтакор”, “Қизилқум” жамоалари билан бўлиб туришибди.

Жамоа аъзоларининг биринчи даврадаги улушларига тўхталадиган бўлсак, бу борада ўтган мавсумда бўлгани каби жамоа сардори Ҳикмат Ҳошимов бошқаларга ўрнак бўлаяпти. Бу йилги мавсумда 400-лик давондан ошиб ўтган Ҳикмат Ҳошимов 15 та ўйиннинг барчасида тўлиқ ҳаракат қилди. Сардордан ташқари жамоа ҳимоячиси Мирғиёс Сулаймонов ҳам юз фоизлик натижани қайд этиб турибди. Жамоанинг яна тўрт нафар ўйинчиси ҳам 15 тадан учрашувда майдонга чиқишган. Аммо улар баъзи учрашувларда ўз ўринларини бошқа жамоадошларига бўшитиб беришганлиги боис уларда ўйин дақиқаси камроқ.

Жамоанинг сермаҳсул ҳужумчиси Зоҳид Абдуллаев биринчи даврада рақиблар дарвозасига 10 та гол киритиб, чемпионат тўпурарлари рўйхатида етакчилардан бири бўлиб турибди. Қуйида берилаётган тақвимда сизни қизиқтирувчи бошқа маълумотлар ҳам берилмоқда. Голлардан бири “Шўртан” ҳимоячиси Ҳ.Эргашев ҳисобига ёзилган (автогол).