Жанубий Суданда бўлган таъсирли ҳикоя: "Милан"нинг ямоқ футболкаси

Жанубий Суданда май ойидан бери 620 мингдан ортиқ одам кучли сув тошқинидан жабр кўрди — фуқаролар уруши тугаганидан бир йил ўтиб, фалокат юз берди. Ана шундай вазиятларнинг бирида даниялик фотограф Ян Граруп Африка мамлакатига боришга қарор қилди. У ерда бир болакай билан бўлган учрашув унга қаттиқ таъсир қилди. Бу ҳақида у ўзининг ижтимоий тармоғи орқали хабар берди:

"Мен футбол ишқибози эканим ҳеч кимга сир эмас — дунёнинг деярли ҳар бир мамлакатида севимли клубим бор. Италиядан "Милан"ни ҳамда Златанни жуда яхши кўраман. Яқинда Жанубий Суданнинг сув босган ҳудудларига сафар уюштирдим. Саёҳат давомида футболни севадиган, аммо кучли сув тошқинлари туфайли ҳеч қаерда футбол ўйнашга бирор жойи йўқ болаларни учратдим.

Нил қирғоғидаги Канал деб ном олган бир қишлоқда "Милан"нинг эски футболкасини кийиб олган бир болакай эътиборимни тортди. Футболка жуда ҳам эски ва бир нечта жойлари тикилган ҳам эди. У билан суҳбатлашдим ва биз "ўзгача" келишувга эришдик: унга янги форма олиб бердим, эскисини эса менга берди... У бундан жуда ҳам хурсанд бўлиб кетди, ҳаттоки, ичида мени ақлдан озган оқ танли йигит деб ўйлаган бўлса ажабмас. Бўлиши мумкин... Лекин мен учун унинг футболкаси санъат, садоқат ва муҳаббат рамзи эди. Ҳозир форма шу ерда, Данияда. Жанубий Судандаги болалар учун ЮНИСЕФнинг муҳим тадбирини қўллаб-қувватлаш мақсадида, мен формани махсус рамкага жойлаштириб, уни ким ошди савдосига қўймоқчиман.

Шунингдек, Ян — ўғли ҳам футболкаларини африкалик болакайларга совға қилмоқчилиги ҳақида айтди.

"Нега "Милан", Балотелли, Ибрагимович ёки "россонери"нинг даниялик ўйинчиси Симон Кьер бунга муносабат билдирмаётганига ҳайрон бўляпман", — деб кеча пост жойлади Граруп (биринчи постидан бир ҳафта ўтгач). — Биз беэътибор бўлмаган инсонгагина футболкани сотамиз. Барчаси ЮНИСЕФнинг Судандаги ишларини қўллаб-қувватлаш мақсадида бўлмоқда. Ҳа, айтганча, ўғлим Элиас футболни яхши кўрадиган африкалик қиз ва ўғил болаларга ўзининг 200 дан ортиқ футболкаларини совға қилишга қарор қилди".

Нозима Зарипова таржимаси