Жамшид Ҳасанов: "Қизилқум"нинг биринчи даврадаги ўйини иккинчи даврада ҳам давом этди. Лекин..."

Биринчи даврани кўтаринки руҳда ўтказган Ҳамиджон Актамов шогирдлари, мавсумнинг иккинчи қисмида омадсизликка учради. Қатор учрашувларда муҳим очколарни йўқотди. Биз бу борада жамоанинг тажрибали футболчиси Жамшид Ҳасановнинг фикрлари билан қизиқдик. 

- Дастлаб мавсум ҳақидаги фикрларингизни билдирсангиз. Биринчи даврадаги "Қизилқум" билан, иккинчи даврадаги жамоани фарқи катта бўлди...

- Тўғри биринчи даврани яхши ўтказдик. Кўп очколарни жамғаришга эришдик. Умуман олганда ҳаммаси яхши ўтди. 

- Нима, деб ўйлайсиз жамоа кучни нотўғри тақсимладими? Яъни бор энергия биринчи даврада тугаб бўлгандек кўринди....

- Йўқ, ундай ўйламайман. Чунки иккинчи даврада ҳам биринчи даврадаги ўйинимизни кўрсата олдик. Лекин омад етишмади. Спортда омад катта рол ўйнайди. Ўйин пайтида кўп вазиятлар яратдик. Ҳаттоки 11 метрлик нуқтадан гол ура олмаган пайтларимиз бўлди. Мағлубиятга тенг дуранглар қайд этилди. 

- Иккинчи даврада жамоа мағлубиятга учраган қайси учрашувда ғалабага ҳақли эди?

- Барча учрашувларни мисол келтиришим мумкин. 90 дақиқа давомида ўйинни ўз қўлимизга олиб кичик бир хато эвазига мағлубиятга учрадик. 

- Навбатдаги мавсумга қандай режалар тузяпсиз?

- Уни вақт кўрсатади. Тақдирда қаер ёзилган бўлса, ўша ерда тўп тепамиз. 

- Хориждан таклифлар келиб тушса, чемпионат даражасига эътибор қаратасизми?

- Албатта чемпионат даражасига қарайман. Ўйлайманки, ҳозирда ўзимизнинг чемпионат ҳам кучайиб бормоқда. Юқори ўринлар учун курашда рақобат кучайди. 

Абдулазиз Искандаров суҳбатлашди